कृषी हवामान : पाऊस शेतकऱ्यांचे टेन्शन वाढवणार! या जिल्ह्यांना IMD चा इशारा, काय काळजी घ्याल?

उत्तर गुजरात आणि नैऋत्य राजस्थानमध्ये कमी दाबाचे क्षेत्र (डिप्रेशन) सक्रीय आहे. ही प्रणाली दिसा गुजरातपासून ४० किमी पश्चिम, राधांपूरपासून ५० किमी ईशान्य तर भूजपासून २३० किमी पूर्वेकडे होती. यामुळे छत्तीसगडपर्यंत हवेचा कमी दाबाचा पट्टा तयार झाला आहे. हा पट्टा शिवपूर, गुना, दामोह, माना, गोपालपूर ते पूर्व-मध्य बंगालच्या उपसागरापर्यंत पसरला आहे. तसेच, बंगालच्या उपसागरात ओडिशा आणि आंध्र प्रदेशच्या किनाऱ्यालगत ३.१ ते ५.८ किमी उंचीवर चक्राकार वाऱ्यांची स्थिती दिसत आहे.

पूर्व विदर्भातील वर्धा, नागपूर, भंडारा, गोंदिया, चंद्रपूर आणि गडचिरोली जिल्ह्यांत विजांसह पावसाची शक्यता असल्याने येलो अलर्ट जारी आहे. तसेच, मराठवाड्यातील परभणी, हिंगोली, नांदेड आणि लातूर जिल्ह्यांतही पावसाचा अंदाज आहे. उर्वरित महाराष्ट्रात हलक्या सरी आणि पावसाची उघडीपी कायम राहील.

वर्धा, नागपूर, भंडारा, गोंदिया, चंद्रपूर, गडचिरोली

सध्या खरीप पिकं परीपक्वतेच्या अवस्थेमध्ये आहेत. अशा वेळी शेतकऱ्यांनी पुढील काळजी घेणं आवश्यक आहे पिकांवर पडणारा पाऊस व आर्द्रतेमुळे बुरशीजन्य रोग (उदा. डाग, करपा, कुज) वाढू शकतात. यासाठी कार्बेन्डाझिम, मॅन्कोझेब किंवा कॉपर ऑक्सिक्लोराईड यापैकी योग्य फवारणी करावी. पिकं वाकू नयेत म्हणून शेतात निचऱ्याची सोय करून ठेवावी.