Dairy Farming : गाई-म्हशींचे दूध काढताना 'या' खास गोष्टी लक्षात ठेवा, जाणून घ्या योग्य वेळ आणि पद्धत

एका अहवालानुसार, पशुपालकांना त्यांच्या जनावरांपासून अधिक दूध उत्पादन मिळवायचे असेल तर सकाळची वेळ सर्वोत्तम मानली जाते. याचे कारण असे की जेव्हा जनावरे रात्रभर विश्रांती घेतात तेव्हा त्यांच्या कासेत दूध व्यवस्थित जमा होते आणि मग सकाळी वासराला दूध पाजल्यावर ते व्यवस्थित बाहेर येते. याशिवाय जनावरे रात्रभर अन्न खाल्ल्यानंतर सकाळपर्यंत त्याचे पचन व्यवस्थित होते, त्यामुळे सकाळपर्यंत दूध उत्पादन वाढते.

दरम्यान, दूध काढण्यापूर्वी जनावराची कास पूर्णपणे स्वच्छ करावी. यासाठी कोमट पाण्याचा वापर करावा. गाई आणि म्हशींचे दूध काढताना त्यांना आरामदायी वातावरण देण्याचा प्रयत्न करावा, जेणेकरून त्यांना तणावमुक्त वाटेल. तसेच दूध काढताना जनावरांभोवती शांतता ठेवावी. लक्षात ठेवा की गाय किंवा म्हशीचे दूध काढताना कासेला हलक्या हाताने दाबून दूध काढावे. त्यांच्या कासेला जास्त दाब देणे किंवा ओढणे टाळावे, कारण असे केल्याने कासेला इजा होऊ शकते. तसेच दूध काढल्यानंतर कासेवर अँटीसेप्टिक क्रीम लावावी, ज्यामुळे संसर्गाचा धोका कमी होतो.