परदेशात अभ्यास दौरा करण्यासाठी जाणाऱ्या शेतकऱ्यांना सरकार किती पैसे देते?

या योजनेचा लाभ घेण्यासाठी इच्छुक शेतकऱ्यांनी तालुका कृषी अधिकारी कार्यालयात प्रत्यक्ष जाऊन अर्ज सादर करावा लागतो. नंतर जिल्हास्तरावर ठरविण्यात आलेल्या लक्षांकानुसार सोडत पद्धतीने शेतकऱ्यांची निवड केली जाते. ही निवड पूर्णपणे पारदर्शक आणि नियमांनुसार केली जाते.

या योजनेअंतर्गत सरकार दौऱ्याच्या एकूण खर्चाच्या 50% किंवा कमाल 1,00,000 इतके अनुदान देत आहे. उर्वरित खर्च शेतकऱ्यांनी स्वतः भरायचा असतो. मात्र, ही रक्कम फक्त अधिकृत सूचना प्राप्त झाल्यानंतरच भरायची आहे.

अलीकडच्या काळात सोशल मीडियावर या योजनेबाबत चुकीची व दिशाभूल करणारी माहिती पसरवली जात असल्याचे कृषी विभागाच्या निदर्शनास आले आहे. काही पोस्ट्समध्ये दौऱ्यासाठी पैसे आगाऊ भरण्याचे आमिष दाखवले जात आहे. शेतकऱ्यांनी अशा बनावट माहितीला बळी पडू नये, असे आवाहन सरकारतर्फे करण्यात आले आहे. खऱ्या माहितीकरिता तालुका कृषी अधिकारी किंवा जिल्हा अधिक्षक कृषी अधिकारी कार्यालयाशी थेट संपर्क साधावा.

या योजनेमुळे महाराष्ट्रातील शेतकऱ्यांना इतर देशांमधील उच्च तंत्रज्ञान आधारित शेती, सेंद्रिय शेती, ड्रोन वापर, जल व्यवस्थापन, बाजार व्यवस्था आणि प्रक्रिया उद्योग यांचा अनुभव मिळणार आहे. हे ज्ञान आपल्या शेतीत वापरून शेतकरी उत्पादन वाढ, खर्च कमी आणि नफा वाढवू शकतात.