23 वर्षांची श्रीपती ही तमिळनाडूतील तिरुवन्नामलाई जिल्ह्याच्या दुर्गम भागातील पुलियूर या गावातील आदिवासी आहे. तिची दिवाणी न्यायाधीश म्हणून निवड करण्यात आली आहे. प्रतिकूल परिस्थितीवर मात करत मेहनतीच्या बळावर तिने हे यश मिळवलं आहे. तमिळनाडूचे मुख्यमंत्री एम. के. स्टॅलिन यांनी सोशल मीडियावर पोस्ट लिहून तिचं अभिनंदन केलं आहे.
श्रीपती हिने तिच्या प्रसूतीनंतर अवघ्या काही दिवसांतच सुमारे 250 किलोमीटरचा प्रवास करुन चेन्नईला जाऊन दिवाणी न्यायाधीश पदासाठीची परीक्षा दिली होती. आदिवासी म्हणून अत्यंत दुर्गम भागात राहाणाऱ्या, कोणत्याही पायाभूत सुविधा नसलेल्या वर्गातील एका तरुणीला हे यश मिळालेलं बघून मला आनंद आणि अभिमान वाटतो अशा शब्दांत एम. के. स्टॅलिन यांनी श्रीपती हिची प्रशंसा केली आहे. स्टॅलिन आपल्या पोस्टमध्ये म्हणाले, द्रमुकच्या द्रविड मॅाडेल सरकारने सरकारी नोकऱ्यांमध्ये तमिळ माध्यमात शिकलेल्या उमेदवारांना प्राधान्य देण्याचा निर्णय घेतला. त्याद्वारे श्रीपतीची दिवाणी न्यायाधीश म्हणून निवड करण्यात आली. श्रीपती हिची आई आणि पती यांनी तिला दिलेल्या भक्कम पाठिंब्यासाठी मी त्यांचंही अभिनंदन करतो, असंही स्टॅलिन यांनी म्हटलं आहे. तमिळनाडूचे क्रीडा मंत्री उदयनिधी स्टॅलिन यांनीही श्रीपतीचं अभिनंदन केलं. तमिळ माध्यमात शिकल्यामुळे सरकारी योजनेचा लाभ मिळवत श्रीपतीने हे यश संपादित केल्याबद्दल उदयनिधी स्टॅलिन यांनी देखील आनंद आणि समाधान व्यक्त केलं.
advertisement
‘इंडियन एक्सप्रेस’ ने दिलेल्या वृत्तानुसार लेखी परीक्षेत उत्तीर्ण झाल्यानंतर श्रीपतीला मुलाखतीसाठी बोलावण्यात आलं होतं. तिच्या गावात तिच्यासाठी कौतुक सोहळ्याचं आयोजन करण्यात आलं. ढोलताशांच्या गजरात वाजत गाजत गावकऱ्यांनी तिचं स्वागत केलं. श्रीपतीने बीए आणि एलएलबी पर्यंतचं शिक्षण येलागिरी हिल्स इथे पूर्ण केलं.