Dehydration : पाणी कमी प्यायल्याचे शरीरावर होतात परिणाम, पुरेसं पाणी प्या, शरीराची निगा राखा

पुरेसं पाणी प्यायलं नाही तर शरीरात काही लक्षणं दिसतात. योग तज्ज्ञांनी डिहायड्रेशनचे संकेत कसे ओळखायचे याविषयी माहिती दिली आहे. पाणी पुरेसं प्यायलं नाही तर शरीरात आरोग्याशी संबंधित अनेक समस्यांचा शिरकाव होतो.

शरीराला योग्यरित्या कार्य करण्यासाठी पाण्याची आवश्यकता असते. पाणी पुरेसं नसेल तर डिहायड्रेशन म्हणजेच शरीरात पाण्याची कमतरता निर्माण होते. बऱ्याच वेळा, पाण्याअभावी, अनेकांना उभं राहताना चक्कर येते किंवा अशक्तपणा जाणवतो. समस्या खूप गंभीर होण्यापूर्वी, शरीरात डिहायड्रेशनची लक्षणं दिसतात, ती ओळखली तर हा धोका टाळता येतो.

advertisement

Hair Care : पावसाळ्यासाठी बनवा नैसर्गिक हेअर मास्क, कोरडे - कडक केस होतील मऊ

ही लक्षणं वेळीच ओळखणं खूप महत्वाचं आहे. योग तज्ज्ञ मयूर कार्तिक यांनी इंस्टाग्राम अकाउंटवर याबद्दल एक व्हिडिओ शेअर केला आहे. ज्यामध्ये शरीरात पाण्याची कमतरता भासल्यास कोणती लक्षणं दिसून येतात याविषयीची माहिती दिली आहे.

डिहायड्रेशनची लक्षणं

गडद रंगाची लघवी होणं -

शरीराला पुरेसं पाणी मिळालं नाही तर लघवीचा रंग गडद होऊ लागतो. गडद पिवळा किंवा नारिंगी रंगाचा लघवीचा रंग म्हणजे शरीराला पाण्याची गरज आहे.

बद्धकोष्ठता -

पचनक्रिया सुरळीत होण्यासाठी पाण्याची मदत होते. शरीरात पाण्याची कमतरता असते तेव्हा अन्न पचवण्यास अडचण येते. यामुळे बद्धकोष्ठतेची समस्या उद्भवते. एखाद्या व्यक्तीला शौचास जाण्यास त्रास होतो. पाण्याअभावी, मल कठीण होतं आणि व्यक्तीला बराच वेळ बाथरूममध्ये बसावं लागतं.

डोकेदुखी आणि थकवा -

पुरेसं पाणी प्यायलं नसेल तर डोकं दुखतं. यामुळे शरीरात थकवा जाणवतो. पाणी पुरेसं असेल तर ही समस्या उद्भवत नाही. डिहायड्रेशनवर मात करण्यासाठी, पाण्याव्यतिरिक्त, फळांचा रस, भाज्यांचा रस आणि नारळ पाणी पिणं हे देखील चांगले पर्याय आहेत.

Kidneys : किडन्यांचं आरोग्य जपा, अनावश्यक गोष्टी टाळा, मूत्रपिंडांची ताकद ओळखा

मुख दुर्गंधी -

पाणी पुरेशा प्रमाणात प्यायलं नाही तर तोंडात बॅक्टेरिया साचून राहतात आणि लाळेचं उत्पादन देखील कमी होतं. यामुळे तोंडातून दुर्गंधी येऊ लागते. पुरेसं पाणी प्यायल्यानं तोंडातील घाण निघून जाते आणि तोंडात लाळही तयार होत राहते.

स्नायूंमध्ये वेदना -

योग्य प्रमाणात पाणी प्यायल्यानं रक्तप्रवाह देखील सुधारतो. याउलट, पुरेसं पाणी प्यायलं नाही तर रक्तप्रवाहात अडथळा येतो आणि त्यामुळे स्नायूंमध्ये वेदना आणि कडकपणा जाणवतो.

तोंड आणि घसा कोरडं होणं -

शरीरात पाण्याची कमतरता असेल तर तोंड आणि घशात कोरडेपणा जाणवतो. वारंवार तहान लागत असेल तर शरीरात पाण्याची कमतरता असल्याचा तो संकेत आहे.

त्वचा कोरडी होणं -

शरीरात आतून पाण्याची कमतरता असेल तर त्याचा परिणाम बाहेरूनही दिसून येतो. ज्यांच्या शरीरात पुरेसं पाणी नसतं, त्यांची त्वचा खडबडीत आणि कोरडी दिसते. हा कोरडेपणा दूर करण्यासाठी, पुरेसं पाणी पिणं शरीराची गरज आहे.