TRENDING:
शेवगा ही सुपरफूड म्हणून ओळखली जाते. ही पौष्टिक आणि औषधी भाजी आहे. शेवग्याची पानं, शेंग पाने, फुलं यांची भाजी केली जाते. शेवग्याची शेंग उसळ, आमडी, भाजी, सांबारमध्ये वापरतात, याचं सूपही बनवतात. शेवग्याच्या पानांची पालेभाजी करतात, शेवग्याच्या फुलांचीही भाजी केली जाते. एकंदर काय तर शेवगा एक भाजी आणि त्याची भाजी तुम्ही आजवर खातच आला आहात. पण आता तुम्हाला आम्ही शेवग्याचे लाडू कसे बनवायचे ते दाखवणार आहोत.
advertisement
शेवग्याचे लाडू बनवण्यासाठी तुम्हाला सगळ्यात आधी लागेल ती म्हणजे शेवग्याची पावडर, जी शेवग्याची पानं सुकवून बनवली जाते. तुम्हाला ही बाजारात किंवा ऑनलाईन वेबसाईट्सवरही मिळेल. गॅसवर कढई ठेवून त्यात शेवग्याची पावडर आणि बेसन थोडं तूप टाकून एकत्र करून छान भाजून घ्या. एका ताटात काढा. काजू-बदाम थोडे तुपात परतून घ्या. सुकं खोबरं, काळे तीळ, हलीम एकएक करून पॅनवर थोडं परतून घ्या. खजूर आणि मणुकाही एकत्र परतून घ्या. थोड्या पाण्यात गूळ, वेलची पूड, तूप टाकून उकळी काढून गूळाचं पाणी करून घ्या.
आता भाजलेले काजू बदाम, सुकं खोबरं, काळे तीळ, हलीम सगळं बेसन आणि शेवग्याचा पावडरीच्या भाजलेल्या मिश्रणात एकत्र करून गूळाच्या पाण्यात टाका. यातच खजूर आणि मणुकाही अॅड करा. मिश्रण चांगलं एकत्र करून घ्या.
Pohe Recipe Video : दररोज कांदेपोहे खाऊन कंटाळलात, आता पोह्यांवर बेसन टाकून पाहा
आता मिश्रण दुसऱ्या भांड्यात काढा. त्याच्यात गुठळ्या असतील तर हातांनी त्या कुस्करून घ्या आणि लाडू वळून घ्या. खायला तयार शेवग्याचे लाडू.
हिवाळा म्हणजे मेथी, डिंक, तीळ असे लाडू खाल्ले जातात. त्याऐवजी तुम्ही आता शेवग्याचे लाडूही ट्राय करू शकता. एकदा बनवून पाहा आणि कसे झाले आम्हाला आमच्या सोशल मीडियाच्या कमेंट बॉक्समध्ये नक्की सांगा. aamhi_malvani_15 इन्स्टाग्राम अकाऊंटवर हा व्हिडीओ पोस्ट करण्यात आला आहे.