नॉर्मल डिलिव्हरी हवी आहे? 38 व्या आठवड्यानंतर 'हे' 2 व्यायाम ठरू शकतात गेम चेंजर; तज्ज्ञांचा मोलाचा सल्ला

नॉर्मल डिलिव्हरीसाठी गरोदरपणाच्या शेवटच्या टप्प्यात नेमके काय करावे? यावर मुंबईतील प्रसिद्ध स्त्रीरोग तज्ज्ञ डॉ. आशिक अली (Dr. Aashiq Ali) यांनी मोलाचे मार्गदर्शन केले आहे.

38 व्या आठवड्यानंतर 'हे' दोन व्यायाम आहेत महत्त्वाचे

डॉ. आशिक अली यांच्या मते, जर तुमची प्रेग्नेंसी सुरक्षित असेल आणि कोणतेही कॉम्प्लिकेशन्स नसतील, तर 38 व्या आठवड्यानंतर तुम्ही दोन विशेष व्यायाम प्रकारांवर लक्ष केंद्रित केले पाहिजे.

advertisement

1. डक वॉक (Duck Walk):

हा व्यायाम करताना एखाद्या बदकाप्रमाणे खाली बसून चालण्याचा प्रयत्न केला जातो.

फायदा: यामुळे मांड्या, कंबर आणि पेल्विक ( ओटीपोटाच्या खालचे) स्नायू मजबूत होतात. पेल्विक एरियामध्ये लवचिकता वाढल्यामुळे बाळाला खाली सरकण्यास आणि बाहेर येण्यास मदत होते. लेबर पेन दरम्यान येणारा दबाव सहन करण्याची ताकद यामुळे मिळते.

2. बटरफ्लाय स्ट्रेच (Butterfly Stretch):

जमिनीवर बसून दोन्ही पाय दुमडून तळवे एकमेकांना जोडणे आणि गुडघे फुलपाखराच्या पंखांप्रमाणे हलवणे याला बटरफ्लाय स्ट्रेच म्हणतात.

फायदा: या व्यायामामुळे पेल्विक फ्लोअरचे स्नायू रिलॅक्स होतात आणि कमरेतील ताण कमी होते. यामुळे शरीराच्या खालच्या भागात रक्तभिसरण सुधारते आणि बाळ योग्य स्थितीत येण्यास मदत होते. शारीरिक फायद्यांसोबतच हा व्यायाम मानसिक शांतता देण्यासही मदत करतो.

केवळ व्यायाम पुरेसा नाही; या गोष्टींचीही ठेवा काळजी

डॉक्टरांच्या मते, केवळ व्यायाम करून चालणार नाही, तर तुम्हाला तुमच्या संपूर्ण जीवनशैलीवर लक्ष द्यावे लागेल. तुमच्या आहारात प्रोटीन, लोह (Iron), कॅल्शियम आणि फायबरचे प्रमाण योग्य असावे. शरीरात पाण्याची कमतरता भासू देऊ नका. बाळाची स्थिती, त्याचे वजन आणि तुमची प्रकृती समजून घेण्यासाठी नियमित चेकअप करणे अनिवार्य आहे. तणावमुक्त राहणे हा नॉर्मल डिलिव्हरीसाठी एक मोठा मंत्र आहे. तुम्ही जितक्या सकारात्मक राहाल, तितकी तुमची डिलिव्हरी सुलभ होण्याची शक्यता वाढते.

डॉ. अली आवर्जून सांगतात की, प्रत्येक महिलेची प्रेग्नेंसी ही वेगळी असते. त्यामुळे कोणताही व्यायाम सुरू करण्यापूर्वी आपल्या डॉक्टरांचा सल्ला नक्की घ्या. जर तुम्हाला जास्त रक्तस्त्राव, तीव्र वेदना, पाण्याची पिशवी फुटणे किंवा बाळाची हालचाल कमी होणे असे कोणतेही 'डेंजर साइन' दिसले, तर तातडीने रुग्णालयात धाव घ्या.

योग्य आहार, सकारात्मक विचार आणि डॉक्टरांच्या सल्ल्याने केलेला व्यायाम तुमच्या नॉर्मल डिलिव्हरीचा मार्ग सोपा करू शकतो.