देवदर्शनासाठी निघाले अन् घात झाला
मिळालेल्या प्राथमिक माहितीनुसार, अपघातातील हे सर्व प्रवासी दक्षिण सोलापूर तालुक्यातील रहिवासी होते. हे सर्वजण सोलापूरहून नळदुर्ग येथील देवदर्शनासाठी क्रूझर गाडीतून जात होते. महामार्गावरून गाडी वेगात असताना अचानक क्रूझर गाडीचा टायर फुटला. टायर फुटल्यामुळे चालकाचे गाडीवरील नियंत्रण पूर्णपणे सुटले. गाडी जागेवरच पलटी झाली आणि या पलटी झालेल्या क्रूझर गाडीची समोरून येणाऱ्या एका ट्रॅक्टरला जोरदार धडक बसली. हा अपघात इतका भीषण होता की, यात पाच जणांचा जागीच अंत झाला.
advertisement
या अपघातात मृत्यूमुखी पडलेल्या पाचही व्यक्ती भाविक होत्या आणि देवदर्शनाच्या वाटेवर होत्या. अपघाताच्या तीव्रतेमुळे गाडीचा चक्काचूर झाला असून, यामध्ये तीन महिलांचाही समावेश असल्याने हळहळ व्यक्त होत आहे. एका क्षणात होत्याचे नव्हते झाले आणि कुटुंबावर दुःखाचा डोंगर कोसळला. महामार्गावर अपघात झाल्याची माहिती मिळताच स्थानिकांनी तातडीने मदतीसाठी धाव घेतली, परंतु तोपर्यंत अनेकांनी आपले प्राण गमावले होते.
७ ते ८ जण गंभीर जखमी, सोलापूरकडे रवाना
या अपघातात क्रूझर गाडीतील सुमारे सात ते आठ जण गंभीर जखमी झाले आहेत. अपघाताचे स्वरूप पाहता जखमींची प्रकृती चिंताजनक असल्याचे समजते. घटनेची माहिती मिळताच पोलिसांनी आणि स्थानिक बचाव पथकाने तात्काळ घटनास्थळी धाव घेतली. जखमींना तातडीने उपचारासाठी सोलापूर येथील रुग्णालयात दाखल करण्यात आले आहे. जखमींवर वेळेत उपचार व्हावेत यासाठी प्रयत्न सुरू आहेत, मात्र जखमींची संख्या मोठी असल्याने भीती व्यक्त केली जात आहे.