Weather Alert: पश्चिम महाराष्ट्रावर पुन्हा अवकाळी संकट, 48 तासांत बदलणार हवा, IMD चा अलर्ट

उत्तरेकडील थंड वार्‍याचे प्रवाह सुरूच असल्याने राज्यात पारा 7 अंशांच्या खाली घसरला आहे. धुळे येथे हंगामातील नीचांकी 6.1 अंश सेल्सिअस तापमानाची नोंद झाली. आज 20 नोव्हेंबर रोजी राज्यातील थंडीची लाट काहीशी ओसरणार असली तरी राज्यात हुडहुडी कायम राहण्याचा अंदाज हवामान विभागाने वर्तविला आहे. पश्चिम महाराष्ट्रातील हवामान अंदाज जाणून घेऊ.

पुणे जिल्ह्यात थंडीचा कडाका कायम असून बुधवारी 28.3 अंश कमाल आणि 9.3 अंश सेल्सिअस किमान तापमानाचा पारा नोंदविण्यात आला. आज पुणे जिल्ह्यातील कमाल तापमान 28 अंशापर्यंत राहील. तसेच किमान तापमानाचा पारा 11 अंश सेल्सिअस राहील.

साताऱ्यात गारठा वाढत असून धुक्यासह दव पडत आहेत. बुधवारी साताऱ्यातील कमाल तापमानाचा पारा 31.2 अंशावर राहिला. तर 11 अंश सेल्सिअस किमान तापमान नोंदवले गेले. आज सातारा जिल्ह्यात किमान आणि कमाल तापमान 14 ते 32 अंश सेल्सिअस दरम्यान राहील.

कोल्हापूरमध्ये देखील गारठा वाढत असून दिवसाची सुरुवात साधारण 16.2 अंश सेल्सिअसच्या किमान तापमानाने होवून, जसजसा दिवस पुढे जाईल तसतसे कमाल तापमान 30.7 अंश सेल्सिअसवर जाण्याची शक्यता आहे. सकाळी दाट धुक्यासह पडलेल्या थंडीचा गारवा दिवसभर टिकून राहील. दुपारी उन्हाचा चटका वाढला तरी सायंकाळी गारठा वाढण्याची शक्यता आहे.

सोलापूर जिल्ह्यात बुधवारी कमाल तापमान 31.4 अंश सेल्सिअसवर तर किमान तापमान 15.3 अंशावर राहिले. आज कमाल तापमानाचा पारा 34 अंशावर राहील. तसेच किमान तापमानाचा पारा 16 अंशापर्यंत राहील.

सांगली जिल्ह्यात मागील 24 तासात 14.1 अंश सेल्सिअस किमान तापमानाची नोंद झाली. आज जिल्ह्यात कमाल तापमान 32 अंशावर राहिल. तसेच किमान तापमान 14 अंशावर राहील. सांगलीत पहाटे थंडीचा कडाका आणि दुपारी उन्हाचा चटका अशी स्थिती राहील.

पश्चिम महाराष्ट्रातील काही जिल्ह्यांत किमान तापमानात चढ-उतार होत आहे. मात्र थंडीचा कडाका कायम राहण्याची शक्यता हवामान विभागाने वर्तविली आहे. कमाल तापमानातही हळूहळू घट होत असली तरी तुरळक ठिकाणी पारा अद्यापही तिशीपार आहे. पुढील 48 तासांत हवामानात पुन्हा बदलाची शक्यता असून पश्चिम महाराष्ट्रातील तुरळक ठिकाणी गडगडाटी पावसाची शक्यता आहे.