TRENDING:
अशात महायुतीतील तिसरा पक्ष असलेल्या अजित पवारांच्या राष्ट्रवादीची मात्र सगळीकडे परवड होत आहेत. अशा स्थितीत आगामी निवडणुकीत अजित पवार आणि शरद पवार एकत्र येण्याची चर्चा सुरू झाली आहे. पुणे आणि पिंपरी चिंचवड महानगर पालिका निवडणुकीत आधीपासून अजित पवार आणि शरद पवार एकत्र निवडणूक लढणार असल्याची शक्यता आहे. यावर अद्याप शिक्कामोर्तब झालं नसताना आता तिसऱ्या महापालिकेसाठी पवार काका पुतणे एकत्र येणार असल्याची चर्चा सुरू झाली आहे.
advertisement
पुणे आणि पिंपरी चिंचवडनंतर आता मुंबईतही अजित पवार आणि शरद पवार एकत्र येणार असल्याचं बोललं जातंय. मुंबईत एकत्र निवडणूक लढण्याचा प्रस्ताव द्या, असं अजित पवारांनी शरद पवार गटाला सांगितल्याची माहिती सूत्रांकडून दिली जात आहे. अजित पवार गट शरद पवारांसोबत आला, तर मुंबईत महाविकास आघाडीची आणखी ताकद वाढण्याची शक्यता आहे.
खरं तर, राष्ट्रवादी अजित पवार गटाला मुंबईत महायुतीत योग्य त्या जागा मिळणार नाहीत. शिवाय शिवसेना शिंदे गट आणि भाजपही राष्ट्रवादीला सोबत घेण्यास फारसं उत्सुक नाही. त्यामुळे राष्ट्रवादी शरदचंद्र पवार पक्षाला मुंबईत एकत्र निवडणूक लढण्याचा प्रस्ताव द्या, असे अजित पवार यांनी सांगितल्याची सुत्रांची माहिती आहे. असं झाल्यास पुणे, पिंपरी-चिंचवड पाठोपाठ मुंबईतही दोन राष्ट्रवादी एकत्र लढताना दिसतील.
असं असलं तरी राष्ट्रवादी शरदचंद्र पवार पक्ष मात्र मुंबईत शिवसेना ठाकरे गट आणि मनसेबरोबर एकत्र निवडणूक लढण्यास इच्छुक असल्याचं कळतं. त्यामुळे पक्ष फोडून महायुतीत सामील झालेल्या अजित पवारांना शरद पवार सोबत घेणार का? तसा प्रस्ताव देणार का? याकडे सगळ्यांचं लक्ष लागलं आहे.