TRENDING:
अंबरनाथ नगरपालिकेत भाजपने शिंदे गटाला सत्तेपासून रोखण्यासाठी काँग्रेसशी आघाडी केली आहे. भाजप काँग्रेसच्या युतीत सत्ताप्रिय अजित पवार यांच्या नेतृत्वाखालील राष्ट्रवादी काँग्रेस देखील सहभागी आहे. एरवी इतर पक्षांत युती आघाडी होत असतात, तुटत असतात पण राज्य आणि देशपातळीवर विचारधारेच्या मुद्द्यावरून लढणाऱ्या काँग्रेस-भाजपची युती झाल्याने आश्चर्य व्यक्त केले गेले. दोन्ही पक्षांवर टीका सुरू झाल्यानंतर काँग्रेसने आक्रमक पावले उचलून नगरसेवकांवर कारवाई करण्याचे पाऊल उचलले. पक्षाच्या कारवाईच्या भूमिकेमुळे काँग्रेस नगरसेवकांनी थेट भाजपमध्ये प्रवेश केला.
advertisement
त्या नगरसेवकांविरोधात काँग्रेसने मोठं पाऊल उचललं, सपकाळांनी आदेश काढले
अंबरनाथ नगरपालिका निवडणुकीत काँग्रेस पक्षाच्या चिन्हावर निवडून आलेल्या १२ नगरसेवकांनी भाजपामध्ये प्रवेश केला आहे. सदर प्रकार हा पूर्णपणे बेकायदेशीर असून या सर्व १२ नगरसेवकांचे सदस्यत्व रद्द करण्यासाठी काँग्रेस पक्ष कायदेशीर कारवाई करणार आहे.
स्वतंत्र गट स्थापन करणे किंवा नंतर दुसऱ्या पक्षात प्रवेश करणे हे अनैतिक तर आहेच पण असंवैधानिकही आहे. लवकरच या सर्वांना कायदेशीर नोटीसा बजावण्यात येतील, अशी माहिती महाराष्ट्र प्रदेश काँग्रेस कमिटीचे वरिष्ठ प्रवक्ते सचिन सावंत यांनी दिली आहे.