याबाबत मिळालेल्या माहितीनुसार, सिडकोने ठाणे ते नवी मुंबई विमानतळादरम्यान एलिव्हेटेड कॉरीडॉरसाठी 'अर्बन मास ट्रान्झिट कंपनी'च्या मार्फत प्रकल्प अहवाल (डीपीआर) तयार केला आहे. 25.2 किलोमीटर लांबीच्या सहा लेनच्या एलिव्हेटेड रोडची, ठाणे ते प्रस्तावित ठाणे कोस्टल रोड भाग दोन आणि कोपरी पटणी पुलामार्गे थेट नवी मुंबई आंतरराष्ट्रीय विमानतळापर्यंत प्रवास करण्याच्या दृष्टीने आखणी केली आहे.
advertisement
नवी मुंबई विमानतळाचं महत्त्व लक्षात घेता विमानतळाच्या आजूबाजूच्या परिसरातील विकासात आणि पायाभूत सुविधांमध्ये वाढ करण्यात येणार आहे. नवी मुंबई आंतरराष्ट्रीय विमानतळ सुरू झाल्यानंतर ठाणे, कल्याण, भिवंडी, डोंबिवली आदी भागातील प्रवाशांना मोठा फायदा होणार आहे. त्यासाठी महानगर प्रदेश क्षेत्रातील विविध भागांना नवी मुंबई विमानतळाशी जोडणं गरजेचं असल्यामुळे मोठ्या प्रमाणावर पायाभूत प्रकल्प उभारण्यात येणार आहे.
या रस्त्यांना जोडणार एलिव्हेडेट कॉरीडॉर
समोर आलेल्या माहितीनुसार, या कॉरीडॉरमध्ये सहा प्रमुख इंटरचेंज असतील. हे इंटरचेंज कोपरी पटणी पूल, घणसोली-ऐरोली खाडी पूल, कांजुरमार्ग-कोपरखौरणे लिंक रोड, वाशी येथील सायन-पनवेल हायवे, पाम बीच मार्ग आणि उलवे कोस्टल रोड या प्रमुख रस्त्यांना जोडले जातील. मुंबई आणि नवी मुंबईदरम्यान पूर्व पश्चिम आणि उत्तर दक्षिण भागाला जोडला जाईल. हा एलिव्हेडेट मार्ग उलवे कोस्टल रोडला जोडला जाईल. पुढे एका एलिव्हेडेट रोडने नवी मुंबई विमानतळ टर्मिनल्सला जोडला जाईल.