जाधववाडी येथे बाजार समितीच्या पाठीमागील भागात स्मार्ट सिटी आणि मनपा प्रशासनाने भव्य बस डेपो उभारला आहे. दिवाळीपूर्वी येथे 35 ई-बस दाखल होणार आहेत. बससाठी चार्जिंग स्टेशन उभारणीचं काम अंतिम टप्प्यात आहे. गुरुवारी (4 सप्टेंबर) मनपा प्रशासक जी. श्रीकांत यांनी कामाची पाहणी केली.
Private Bus: खासगी बस चालकांचे मनमानी दर, पुणे आरटीओ अ‍ॅक्शन मोडमध्ये, कुठे करायची तक्रार?
advertisement
स्मार्ट सिटी उपक्रमाअंतर्गत 2018 मध्ये शहर बससेवा सुरू झालेली आहे. 35 कोटी रुपये खर्च करून 100 डिझेल बस खरेदी केल्या गेल्या आहेत. बससाठी जाधववाडी परिसरात बस डेपो उभारण्यात आला आहे. याच बस डेपोच्या आवारात ई-बससाठी चार्जिंग स्टेशनची उभारणी सुरू आहे. चार्जिंग स्टेशनसाठी महावितरणने हर्सूल वीज उपकेंद्रापासून बस डेपोपर्यंत एचटी लाइन टाकली आहे. एकाच वेळी 16 बसची चार्जिंग करता येईल.
केंद्र शासनाने बससेवेसाठी हैदराबाद येथील एका खासगी कंपनीची नेमणूक केली आहे. चालक आणि बस त्यांच्याच मालकीचे असतील. वाहक स्मार्ट सिटी प्रशासनाकडून नेमला जाईल. दिवाळीपूर्वी या ई-बस शहरात धावणार आहेत. नऊ व बारा मीटर लांब अशा दोन प्रकारच्या बस असतील. किलोमीटरमागे 64 रुपये कंपनीला द्यावे लागतील.
एकदा चार्ज केलेली बस 270 किलोमीटर चालते असा दावा खासगी कंपनीने केला आहे. पण, शहरातून ही बस 150 किलोमीटर रेंज देईल, असं गृहीत धरण्यात येत आहे. दुपारच्या सत्रात बस चार्ज करण्यासाठी सिडको वाळूंज परिसरात एक चार्जिंग स्टेशन उभारण्यात येणार आहे. सध्या एक ई-बस शहरात धावत असून तिला चांगला प्रतिसाद मिळत आहे.