TRENDING:
कन्नड तालुक्यातील बिजला मनोहर गायकवाड यांचं उपचारासाठी आल्यानंतर रुग्णालयात निधन झालं. त्यानंतर कुटुंबीय पुढील प्रक्रिया पूर्ण करण्यात गुंतले होते. तेव्हा आयसीयूमधून त्यांच्या अंगावरील अंदाजे चार तोळ्यांचे दागिने रहस्यमयरीत्या लंपास झाले. या प्रकरणी क्रांती चौक पोलिसात गुन्हा दाखल करण्यात आला आहे.
वडील आजारी, आई चहा आणायला गेली अन् 14 वर्षाची लेक रुग्णालयातून गायब, छ. संभाजीनगरात काय घडलं?
advertisement
नेमकं घडलं काय?
बिजला गायकवाड यांची 13 नोव्हेंबरला सकाळी तब्येत बिघडल्यामुळे त्यांची मुलं संदीप आणि किरण यांनी त्यांना अदालत रोडवरील न्यायालयासमोर असलेल्या खासगी रुग्णालयात दाखल केले होते. आयसीयूमध्ये उपचार सुरू असताना त्यांच्या अंगावरचे दागिने तसेच होते. दुपारी अचानक त्यांचे निधन झाल्यानंतर मुलांनी आईला पाहिलं, तेव्हादेखील दागिने अंगावरच होते. त्यानंतर पोलिस पंचनामा सुरू झाल्यावर रुग्णालयातील कर्मचाऱ्यांनी मृतदेह झाकण्यासाठी संपूर्ण कपडा गुंडाळून ठेवला. कागदोपत्री प्रक्रिया पूर्ण झाल्यानंतर मृतदेह घाटी रुग्णालयात शवविच्छेदनासाठी घेऊन जात असताना दोन्ही मुलांचे लक्ष दागिन्यांकडे गेले. तेव्हा मात्र 2 तोळ्यांची सोनसाखळी आणि 2 तोळ्यांचे कर्णफुले लंपास झालेले आढळून आले.
दागिने गायब झाल्याचे लक्षात येताच कुटुंबीयांनी तात्काळ वरिष्ठ डॉक्टरांकडे तक्रार केल्यावर डॉ. दिनेश पांडव आणि डॉ. शैलेश खरे यांनी दागिने पाहिल्याचे मान्य केले. तपासात आयसीयूमध्ये एक पेंडल मिळून ते परत देण्यात आले. रुग्णालयाचे सीईओ डॉ. प्रशांत पाटील यांनी सात दिवसांत उर्वरित दागिने मिळवून देण्याचे आश्वासन दिले आहे. मात्र अनेकदा संपर्क करूनही दागिने मिळाले नाहीत. त्यामुळे ही चोरी नर्सिंग स्टाफ किंवा हाऊसकीपिंग कर्मचाऱ्यांनी केली असावी, असा संशय कुटुंबीयांनी तक्रारीत व्यक्त केला आहे.
दरम्यान, क्रांती चौक पोलीस ठाण्याचे अंमलदार संतोष मुदिराज हे पुढील तपास करत आहेत. मृतदेहाच्या अंगावरील दागिने चोरण्याच्या या प्रकाराने संताप व्यक्त होत आहे.