TRENDING:
छत्रपती संभाजीनगर शहरातून अहिल्यानगरमार्गे पुण्याकडे रस्त्याने प्रवास करताना खड्ड्यांमुळे प्रवाशांना मोठ्या त्रासाला सामोरे जावे लागते. त्यामुळे गेल्या काही काळात पुण्याला जाण्यासाठी रेल्वेला प्राधान्य दिले जात होते. नांदेड–पुणे एक्स्प्रेसला महिनाभर आधीच ‘वेटिंग’ लागत असे. मात्र, हीच गाडी आता पुण्याऐवजी हडपसरपर्यंतच धावत असल्याने प्रवाशांचा प्रतिसाद कमी होताना दिसत आहे.
advertisement
ही रेल्वे 26 जानेवारीपासून पुण्याऐवजी हडपसरपर्यंत धावू लागली. यापूर्वी या गाडीचे तिकीट मिळवणे कठीण मानले जात होते. मात्र सध्या परिस्थिती बदलली असून तृतीय श्रेणीत दैनंदिन करंट बुकिंगमध्येही तिकीटे उपलब्ध राहत आहेत. 4 फेब्रुवारी रोजी तर करंट बुकिंगमध्ये तब्बल 50 तिकीटे शिल्लक असल्याचे दिसून आले.
प्रवाशांचा हाच कमी प्रतिसाद पुढेही कायम राहिल्यास रेल्वेला आपल्या निर्णयाचा पुनर्विचार करावा लागू शकतो. संबंधित रेल्वे पुन्हा पुण्यापर्यंत वाढवावी किंवा तिच्या फेऱ्यांमध्ये कपात करावी लागू शकते, असे मत रेल्वे अभ्यासक व्यक्त करत आहेत.
हडपसर नव्हे खडकीपर्यंत असावी गाडी
नांदेड–हडपसर एक्स्प्रेस किमान खडकी स्थानकापर्यंत (जे पुणे स्टेशनपासून सुमारे 8 किलोमीटर अंतरावर आहे) वाढवण्यात यावी, अशी मागणी प्रवासी संघटनांकडून होत आहे. खडकीपर्यंत गाडी गेल्यास विद्यार्थी, नोकरदार आणि उपचारासाठी प्रवास करणाऱ्या रुग्णांना मोठा दिलासा मिळू शकतो. तसेच पिंपरी-चिंचवड भागातील प्रवाशांसाठी अंतरही कमी होऊ शकते, असे प्रवाशांचे मत आहे.
दरम्यान, खडकीनंतर पुणे स्टेशनवर गाडी पोहोचल्यानंतर कोथरूड, कर्वेनगर, शिवाजीनगर तसेच पेठेतील प्रवाशांनाही त्याचा फायदा होईल, असे रेल्वे प्रवासी महासंघाचे सदस्य दयानंद दीक्षित यांनी नमूद केले आहे.