याबाबत मिळालेल्या माहितीनुसार, प्रियंका अनिल खरात (वय 20 रा. बीड बायपास) असं, मृत तरुणीचं नाव आहे. प्रियंकाने बी.फार्मसी शिक्षण पूर्ण केलेलं होतं. प्रियंकाचे वडील अनिल खरात हे देवगाव रंगारी येथे पोलीस हवालदार म्हणून नोकरी करतात. महिनाभरापासून प्रियांकाने जिम जॉईन केली होती. गुरुवारी संध्याकाळी जिमला जाऊन येते, असं सांगून ती घरातून बाहेर पडली होती. तिच्यासोबत भाऊ यश आणि मैत्रीण प्रणाली कुलकर्णी हे देखील तिच्या सोबत होते.
advertisement
जिममध्ये गेल्यानंतर नेहमीप्रमाणे प्रियांकाने व्यायाम केला. व्यायाम झाल्यानंतर प्रियंका भावाची वाट बघत उभी होती. वाट बघत असताना प्रियंकाला अचानक चक्कर आली आणि ती खाली कोसळली. यामुळे तिला तात्काळ खासगी रुग्णालयात दाखल करण्यात आलं. उपचार सुरू असताना प्रियंकाला अचानक हृदयविकाराचा झटका आला आणि तिचा मृत्यू झाला.
प्रियंकाच्या मृत्यूमुळे तिच्या कुटुंबावरती दुःखाचा डोंगर कोसळला आहे. आई बाहेर गेली असल्यामुळे प्रियंका वडिलांना चहा देऊन जीमला गेली होती. ही गोष्ट आठवून तिने वडील भावुक होत आहेत. प्रियंकाचे वडील म्हणाले, "जीमला जाण्यापूर्वी तिने करून दिलेला चहा हा तिच्या हातचा शेवटचा चहा ठरला." प्रियंकाच्या भावाला देखील याचा मोठा धक्का बसला आहे. गादिया विहार येथील स्मशानभूमीमध्ये तिच्यावर अंत्यसंस्कार करण्यात आले.