TRENDING:
शहरात कॅफेंची संख्या वाढली असली तरी, काही ठिकाणी कॅफेच्या नावाखाली तरुण-तरुणींना आकर्षित करून हे अश्लील धंदे सुरू असल्याची माहिती पोलिसांना मिळाली होती. या बेकायदेशीर प्रकाराची खात्री करण्यासाठी कोल्हापूर पोलिसांनी निर्भया पथकातील कर्मचाऱ्याला 'तोतया ग्राहक' बनवून कॅफेमध्ये पाठवले. या कर्मचाऱ्याने कॅफेत प्रवेश करताच जे दृश्य पाहिले, ते अत्यंत धक्कादायक होते.
या कॅफेमध्ये जोडप्यांसाठी स्वतंत्र दोन रूम्स तयार करण्यात आल्या होत्या, वाढदिवस साजरा करण्यासाठी एक वेगळी रूम होती, पण सर्वात धक्कादायक म्हणजे, ३५० रुपये प्रति तास भाड्याने देऊन अश्लील चाळे करण्यासाठी एक 'स्पेशल रूम' दिली जात असल्याचे उघड झाले. या विशेष रूममध्ये आणि परिसराची झडती घेतल्यावर तिथे कंडोमची पाकिटे पोलिसांना आढळली. खात्री होताच निर्भया पथकाने कॅफेवर पूर्णपणे छापा टाकला.
advertisement
अचानक झालेल्या या कारवाईमुळे कॅफेमध्ये उपस्थित तरुण-तरुणींची एकच धांदल उडाली. गोंधळात अनेक जण बाहेर पडण्याचा प्रयत्न करत होते. कारवाईदरम्यान कॅफेमध्ये काही कॉलेज विद्यार्थी-विद्यार्थिनी तसेच बाहेरगावाहून आलेले ग्राहकही उपस्थित होते. पोलिसांनी या गंभीर गैरप्रकाराची नोंद घेऊन तातडीने कॅफेवर कायदेशीर कारवाई सुरू केली आहे. या प्रकरणी कॅफेचा मालक संकेत हुबळे आणि कॅफे चालक शैलेश चंदूरे यांच्यावर गावभाग पोलीस ठाण्यात गुन्हा दाखल करण्यात आला आहे.
शहरात अशा प्रकारे कॅफेच्या नावाखाली सुरू असलेल्या गैरप्रकारांवर पोलिसांनी कडक भूमिका घेतल्याचे स्पष्ट झाले आहे. इचलकरंजी शहरात ही कारवाई झाल्याची माहिती पसरताच, शहरातील अनेक कॅफे चालकांनी तातडीने गावभाग पोलीस ठाण्यासमोर मोठी गर्दी केली. निर्भया पथकाच्या या धाडसी कारवाईमुळे शहरात सुरू असलेल्या अशा अनेक संशयास्पद कॅफे चालकांमध्ये भीतीचे वातावरण निर्माण झाले आहे.