विधानसभा निवडणुकीवेळी काँग्रेस पक्षात असलेली अस्वस्थता समोर आली होती. शारंगधर देशमुख यांनाही कोल्हापूर उत्तरमधून उमेदवारी हवी होती. मात्र पक्षाकडून सकारात्मक प्रतिसाद मिळाला नसल्याने ते नाराज होते. आता महापालिका निवडणुकीआधी त्यांनी पक्ष बदलाचा निर्णय घेतल्याची समजते.
शारंगधर देशमुख यांनी एकनाथ शिंदे यांची भेट घेतली
कोल्हापूर दौऱ्यावर असलेले राज्याचे उपमुख्यमंत्री एकनाथ शिंदे यांची शारंगधर देशमुख यांनी भेट घेतली. या भेटीवेळी पालकमंत्री प्रकाश आबिटकर, शिवसेना आमदार राजेश क्षीरसागर देखील उपस्थित होते. या भेटीत शिंदे आणि देशमुख यांच्यात २० मिनिटे चर्चा झाली. पक्षप्रवेशाचा मुहूर्त लवकरच अंतिम करू, असे चर्चेअंती ठरल्याचे कळते.
advertisement
सतेज पाटील यांचा खंदा समर्थक एकनाथ शिंदे गटात
शारंगधर देशमुख यांची ओळख सतेज पाटील यांचे अतिशय विश्वासू सहकारी म्हणून आहे. देशमुख काँग्रेसचे महापालिकेतील गटनेते होते. त्यांच्या शिंदे गटातील प्रवेशाने सतेज पाटील यांना मोठा धक्का बसणार आहे. महापालिका निवडणुकीआधी देशमुख यांच्यासह काही नगरसेवक शिंदे गटात प्रवेश करणार आहेत. त्यामुळे सतेज पाटील यांची डोकेदुखी निश्चित वाढणार आहे.
काँग्रेसचे ३५ नगरसेवक शिंदे सेनेत?
महापालिका निवडणुकीआधी विरोधकांचे बळ कमी करू. किंबहुना पदाधिकारी पलीकडच्या बाजूला राहायला तयार नाहीत. विकासकामांनी ते भारावून गेले आहेत. काँग्रेसचे ३५ नगरसेवक शिंदेसेनेत येणार असल्याचा दावा काही दिवसांपूर्वी आमदार राजेश क्षीरसागर यांनी केला होता.