Mumbai Local Update : मुंबई लोकल आता 'सुपरफास्ट एक्सप्रेस'च्या वेगात धावणार; मध्य रेल्वेचा महत्त्वाचा प्रकल्प पूर्ण

यार्ड रिमॉडेलिंगसाठी काही दिवसांपूर्वी 15 तासांहून अधिक कालावधीचा मेगाब्लॉक घेण्यात आला होता. या रिमॉडेलिंगमुळे यार्डची क्षमता 25 टक्क्यांने वाढली आहे. कर्जत-पळसदरी दरम्यान नवीन चौथा मार्ग तयार झाला असून यामुळे खोपोली आणि पनवेल मार्गे पुण्याच्या दिशेने जाणाऱ्या मालगाड्या आणि एक्स्प्रेस आता कर्जत मार्गावरून जाण्याची गरज नाही.

यार्डच्या सुधारणा अंतर्गत 8 पूलांचे विस्तार, 2 फूटओवर ब्रिजचे विस्तार तसेच 4.9 किलोमीटर नवीन ट्रॅक जोडणी करण्यात आली आहे. 9 ट्रॅक किलोमीटर अंतराची नवीन ओव्हरहेड इलेक्ट्रिक वायरिंग, 350 मास्ट उभारणी आणि यार्डचे पूर्ण विद्युतीकरण करण्यात आले आहे. याशिवाय, 20 नवीन टर्नआउट्स बसवण्यात आले असून 8 जुने टर्नआउट्स काढून टाकले गेले आहेत, ज्यामुळे ट्रॅकवरील गाड्यांचा प्रवाह अधिक सुरळीत आणि सुरक्षित होईल.

मुंबईकरांसाठी हा बदल खूप महत्वाचा आहे कारण शहरातील लोकल प्रवास रोजच्या जीवनाचा अविभाज्य भाग आहे. कर्जत स्टेशन आणि त्याच्या यार्डचे हे रिमॉडेलिंग प्रकल्प, प्रवाशांच्या वेळेची बचत करण्यास, गाड्यांचे वेळापत्रक सुधारण्यासाठी आणि रेल्वे संचालन अधिक सुरळीत करण्यासाठी महत्त्वपूर्ण ठरले आहे. आता प्रवाशांना वेळेवर पोहोचण्याची चिंता कमी होणार असून, मुंबई लोकल प्रवास आणखी सुरक्षित आणि आरामदायी होईल.