Metro Update : विरार लोकलची गर्दी कमी होणार; अंधेरी ते मिरा-भाईंदर आता मेट्रोने प्रवास होणार सुसाट; महत्त्वाची अपडेट समोर

मेट्रो-9 ही ठाणे जिल्ह्यातील पहिली मेट्रो मार्गिका आहे. दहिसर पूर्व येथून सुरू होणारी ही मार्गिका मिरा-भाईंदर परिसरातील काशिगावपर्यंत जाणार आहे. पहिल्या टप्प्यात दहिसर पूर्व, पांडुरंगवाडी, मिरागाव आणि काशिगाव अशी चार स्थानके प्रवाशांसाठी उपलब्ध असतील. पुढील टप्प्यात साईबाबा नगर, मेदिता नगर, शहीद भगतसिंग गार्डन आणि सुभाषचंद्र बोस स्टेडियम या स्थानकांचा समावेश करण्यात येणार आहे. एकूण 11.38 किमी लांबीच्या या प्रकल्पाचा प्रारंभिक टप्पा सध्या अंतिम चाचणी टप्प्यात आहे.

दहिसर येथे मेट्रो-9 मार्गिका मेट्रो-7 मार्गिकेशी जोडली जाणार आहे. या ठिकाणी प्रवासी सहजतेने मेट्रो-7 अ आणि मेट्रो-2 अ मार्गिकांवर गाडी बदलू शकतील. त्यामुळे अंधेरी पूर्वेतील गुंदवली स्थानकावरून निघालेली मेट्रो थेट मिरा-भाईंदरपर्यंत धावू शकेल. मेट्रो-7 अ मार्गिका आंतरराष्ट्रीय विमानतळाशी जोडली जाणार असल्याने प्रवाशांना विमानतळावरून थेट मिरा-भाईंदरपर्यंत अखंडित प्रवासाची सुविधा मिळेल.

मेट्रो-9 सुरू झाल्यानंतर ठाणे आणि मुंबईदरम्यान प्रवासाचा वेळ लक्षणीयरीत्या कमी होईल. सध्या अंधेरी ते मिरा-भाईंदर प्रवासाला वाहतूक कोंडीमुळे साधारणत दीड ते दोन तास लागतात. मात्र, मेट्रो सुरू झाल्यानंतर हा प्रवास अवघ्या 30 ते 35 मिनिटांत पूर्ण होईल, असा अंदाज आहे.