मुस्लिम समाजाचा पवित्र सण अर्थात मोहम्मद पैगंबर यांचा जन्मदिवस ५ सप्टेंबर रोजी आहे. तर ६ सप्टेंबर रोजी गणेश विसर्जन आहे. त्यामुळे ५ तारखेची मोहम्मद पैगंबर जयंतीची मिरवणूक ८ सप्टेंबर रोजी घेण्याचा निर्णय मुस्लिम समाजाने घेतलेला आहे.
मुस्लिम समाजाच्या आवाहनानंतर राज्य सरकारने सु्ट्टीत केला बदल
मुस्लिम समाजाच्या निर्णयाची नोंद घेऊन ५ सप्टेंबर रोजी जाहीर केलेली शासकीय सुट्टी ८ सप्टेंबर रोजी द्यावी, अशी मागणी काँग्रेस नेते तथा माजी मंत्री नसीम खान यांनी केली होती. त्यांच्या विनंतीला मान देऊन राज्य सरकारने सुट्टी बदलण्याचा निर्णय घेतल्याचे कळते आहे. मुस्लिम समाजाचे आवाहन लक्षात घेऊन मुंबई शहर आणि उपनगरांत ५ सप्टेंबरच्या ऐवजी ८ सप्टेंबरला ईदची सुट्टी देण्याचा निर्णय राज्य शासनाने घेतल्याचे सूत्रांनी सांगितले. मुंबई वगळत इतर जिल्ह्यांमध्ये मात्र ५ सप्टेंबरलाच ईदची शासकीय सुट्टी असेल.
advertisement
ईदच्या सुट्टीसंदर्भात नसीम खान यांचे मुख्यमंत्री फडणवीस यांना पत्र
ईदच्या सुट्टीसंदर्भात काँग्रेस नेते नसीम खान यांनी राज्याचे मुख्यमंत्री देवेंद्र फडणवीस यांना पत्र लिहिले. राज्यात बंधुभाव आणि हिंदू मुस्लिम एकोपा अबाधित राखण्यासाठी मुंबईत विविध मुस्लिम संघटनांनी गुरुवार दिनांक २१ ऑगस्ट रोजी ऑल इंडिया खिलापत कमिटीमध्ये बैठक घेतली. मोहम्मद पैगंबर यांच्या जन्मदिनी मुंबईत काढण्यात येणारी मिरवणूक ही सोमवार दिनांक ८ सप्टेंबर रोजी काढण्याचा निर्णय यावेळी घेण्यात आला आहे, जेणेकरून दोन्ही धर्माचे पवित्र सण हे प्रेम व सद्भावनेने साजरा करता येतील, असे नसीम खान यांनी मुख्यमंत्र्यांना लिहिले पत्रात म्हटले आहे.