TRENDING:
पनवेलमधील तक्का गावातील रहिवासी विष्णू बहिरा यांच्या संपादित जमिनीच्या मोबदल्यात सिडकोकडून मिळणाऱ्या भूखंडासाठी हा मोठा घोटाळा करण्यात आला आहे. विष्णू बहिरा यांचा मृत्यू झाल्यानंतर, बहिरा कुटुंबातील सदस्यांनी संगनमताने बनावट कागदपत्रे तयार करून हा भूखंड मिळवण्याचा कट रचल्याचे सिडकोच्या चौकशीत उघड झाले आहे.
या घोटाळ्यासाठी, मृत विष्णू बहिरा यांचे बनावट ओळखपत्र बनवण्यात आले. विशेष म्हणजे, या ओळखपत्रावर मृत विष्णू बहिरा यांच्याऐवजी सखाराम ढवळे नावाच्या व्यक्तीचा फोटो लावण्यात आला. त्यानंतर ढवळे यांनाच मृत विष्णू बहिरा असल्याचे भासवण्यात आले. या ढवळे नावाच्या व्यक्तीकडूनच बनावट कागदपत्रांवर स्वाक्षऱ्या घेऊन हा संपूर्ण घोटाळा करण्यात आला, अशी धक्कादायक माहिती सिडकोने केलेल्या सखोल चौकशीत समोर आली आहे.
advertisement
२००६ पासून पनवेल तहसील कार्यालय, दुय्यम निबंधक कार्यालय आणि सिडकोच्या विविध कार्यालयांत या बनावट कागदपत्रांचा वापर करण्यात आला होता. भाडेपट्टा करारनामा आणि त्रिपक्षीय करारासारख्या महत्त्वाच्या वेळीही सखाराम ढवळे हा व्यक्ती मृत विष्णू बहिरा म्हणून उपस्थित राहिला होता.
या प्रकरणाची सिडकोने तक्रार केल्यानंतर पनवेल शहर पोलिसांनी सोमवारी (दि. २ डिसेंबर) सुनील बहिरा यांच्यासह १२ जणांविरुद्ध फसवणुकीचा गुन्हा दाखल केला आहे. सुनील बहिरा यांनी नुकताच शेकापमधून भाजपमध्ये प्रवेश केला आहे. या प्रकरणामुळे त्यांच्या अडचणीत वाढ होण्याची शक्यता आहे. पोलीस या भूखंड घोटाळ्याचा पुढील तपास करत आहेत.