रोहित पवार आज सोमवारी सकाळी साडे नऊ वाजता पत्रकार परिषद घेऊन या भ्रष्टाचाराचा खुलासा करणार आहेत. त्यांनी एक्स अकाऊंटवर पोस्ट लिहून याबाबतची माहिती दिली आहे. संबंधित पोस्टमध्ये त्यांनी 'गँग्ज ऑफ गद्दार' असा उल्लेख केला आहे. त्यामुळे कथित ५००० कोटींच्या भ्रष्टाचार प्रकरणात एकनाथ शिंदे गट अथवा अजित पवार गटातील नेता किंवा मंत्री असावा, अशी शक्यता वर्तवली जात आहे. पण रोहित पवारांनी उल्लेख केलेला नेता कोण? हे पुढच्या काही तासांत स्पष्ट होणार आहे.
advertisement
रोहित पवार नेमकं काय म्हणाले?
रोहित पवार एक्सवर केलेल्या पोस्टमध्ये म्हणाले की, मातृभूमीशी गद्दारी करुन इंग्रजांना मदत करणाऱ्या कुटुंबाच्या वारसदारांच्या घशात ५ हजार कोटींचा मलिदा… वर्तमानातील गद्दारांची इतिहासातल्या गद्दारांशी हातमिळवणी. ‘गँग्ज ऑफ गद्दार’चा पर्दाफाश करण्यासाठी भेटू (सोमवार) पत्रकार परिषदेत, अशी पोस्ट रोहित पवार यांनी केली आहे. मुंबईच्या बॅलार्ड इस्टेट येथील राष्ट्रवादी काँग्रेस पार्टी शरदचंद्र पवार पक्षाच्या कार्यालयात होणार आहे.
खरं तर, मागील काही दिवसांपासून रोहित पवार राजकारणात चांगलेच अॅक्टीव्ह झाले आहेत. ते थेट अजित पवारांना देखील शिंगावर घेताना दिसत आहेत. अशात त्यांनी एक्स अकाऊंटवर पोस्ट लिहून खळबळ उडवली आहे. दरम्यान, रोहित पवार आणि अजित पवार यांच्यात सांगलीतील एका कार्यक्रमात चांगलीच जुगलबंदी रंगली होती. रोहित पवारांनी अजित दादांना भावकीची आठवण करुन दिल्यानंतर काका अजित पवारांनीही शेलक्या शब्दात रोहित पवारांचा समाचार घेतला. तसेच, मी भावकी जपली म्हणून तू आमदार झाला, माझ्या नादी लागू नको, अशा शब्दात इशाराही दिला होता. त्यानंतर, आता रोहित पवारांनी आणखी एका मंत्र्याला लक्ष्य केल्याने हे मंत्री महोदय कोण, असा प्रश्न उपस्थित झाला आहे.