मुस्लीम महिलांनी शनिवारवाड्यात नमाज पठण केल्याचा आरोप करून त्याविरोधात आक्रमक भूमिका घेतलेल्या भाजप खासदार मेधा कुलकर्णी यांना महायुतीतूनच विरोध होत आहे. अजित पवार यांच्या नेतृत्वाखालील राष्ट्रवादी काँग्रेस पक्षाने मेधा कुलकर्णी यांच्याविरोधात आंदोलन केले. छत्रपती शिवाजी महाराज की जय अशा घोषणांनी शनिवारवाडा दुमदुमून गेला. राष्ट्रवादीचे कार्यकर्ते मोठ्या संख्येने आंदोलनात सहभागी झाले होते.
advertisement
कोण कट्टर हिंदू याचे प्रमाणपत्र वाटण्याचा अधिकार मेधा कुलकर्णी यांना नाही
आमचा संघर्ष भाजपशी नसून मेधा कुलकर्णी यांच्याशी आहे. त्या खासदार आहेत परंतु त्यांना कायद्याची कोणतीही जाण नाही. त्या स्वत:ला कट्टर हिंदुत्ववादी मानतात परंतु आम्ही त्यांच्यासारखे हिंदू नाही जे जातीजातीत भांडणे लावतील, द्वेषपूर्ण वातावरण करतील. कोण कट्टर हिंदू याचे प्रमाणपत्र वाटण्याचा अधिकार मेधा कुलकर्णी यांना दिलेला नाही आणि शनिवारवाडा त्यांच्या बाबांचा नाही, असे रुपाली पाटील म्हणाल्या.
सौभाग्याचे लेणे म्हणजे हिरवा रंग, मग हिरव्याचा द्वेष का?
मुस्लीम महिलांनी शनिवारवाड्यात नमाज पठण केल्याचा व्हिडीओ कुलकर्णी यांनी ट्विट केला. तो व्हिडीओ कधीचा आहे हे माहिती नाही. परंतु तो व्हिडीओ खरा आहे हे आपण मानायचे झाले तर नमाज पठण केल्याने कोणता धोका निर्माण झालाय, असा सवाल रुपाली पाटील यांनी केला. हिंदू धर्मियांमध्ये सौभाग्याचे लेणे म्हणजे हिरवा रंग, मग हिरव्याचा द्वेष का? असेही रुपाली पाटील यांनी विचारले.
शनिवारवाड्याच्या पुढे असलेल्या मजारीची नोंद १९३६ मध्ये पुरातत्व विभागाकडे
शनिवारवाड्याच्या पुढे असलेल्या मजारीची नोंद १९३६ मध्ये पुरातत्व विभागाकडे असल्याचे सांगत मेधा कुलकर्णी यांना केवळ हिंदू मुस्लीम वाद निर्माण करायचा आहे, असा गंभीर आरोप पाटील यांनी केला.