ड्रोन कॅमेऱ्यात मगर स्पष्ट दिसली!
सोमवारी सकाळी 9 वाजण्याच्या सुमारास छायाचित्रकार सुरेश पवार हे प्रीतिसंगमाचे विहंगम दृश्य आपल्या ड्रोन कॅमेऱ्यात टिपत होते. त्याचवेळी शहराच्या शुक्रवार पेठेच्या विरुद्ध दिशेला, गोटे गावच्या हद्दीलगत नदीपात्रात एक मोठी मगर पहुडलेल्या अवस्थेत स्पष्टपणे दिसली. या घटनेमुळे केवळ कृष्णानदीतच नाही, तर कोयना नदीतही मगरींचे वास्तव्य आहे, हे स्पष्ट झाले आहे.
advertisement
आधीही घडल्या होत्या घटना, आता नागरिकांनी सावध राहावे
मागील दोन-तीन वर्षांपासून कराडसह गोटे, खोडशी, सैदापूर गावांच्या परिसरात मगरींचा वावर असल्याचे दिसून आले होते. सध्याचा ड्रोन व्हिडीओ त्याचा एक ठोस पुरावा ठरलेला आहे. काही वर्षांपूर्वी पोहायला गेलेल्या एका नागरिकावर मगरीने हल्ला केल्याची गंभीर घटना घडली होती. त्या व्यक्तीने प्रसंगावधान राखून स्वतःचा जीव वाचवला असला तरी ते जखमी झाले होते. हा धोका असतानाही अनेक नागरिक बिनधास्तपणे संगमावर पोहायला येतात. या ताज्या घटनेने सर्वांसाठी एक मोठा धोका निर्माण झाल्याचे संकेत दिले आहेत. त्यामुळे नागरिकांनी नदीत उतरताना किंवा नदीकिनारी वावरताना अत्यंत सावधगिरी बाळगणे गरजेचे आहे.
https://youtube.com/shorts/Zm5IvAJGs5Q?si=haoZwQf4Ddd_sSvf
यापूर्वीही विद्यानगर (सैदापूर) येथील कृष्णा कॅनाॅल आणि खोडशी येथे मगर पकडण्यात यश आले होते. त्यावेळी कृष्णा नदी आणि कॅनाॅलमध्ये खूप अंतर असूनही मगर आढळली होती, ज्यामुळे एकच खळबळ उडाली होती. त्यानंतर ती मगर पकडून सुरक्षित स्थळी सोडून देण्यात आली होती. या घटनांनंतर आता कराड शहरालगत नदीकिनारी पुन्हा मगर दिसल्याने काहीसे चिंतेचे वातावरण निर्माण झाले आहे.
हे ही वाचा : Kolhapur News: कोल्हापूर सर्किट बेंचमध्ये 'या' 6 जिल्ह्यांचा समावेश; उद्घाटन समारंभाची तारीख बदलली!
हे ही वाचा : कोल्हापूरमध्ये 'ई-ऑफिस' बंधनकारक, जिल्ह्याधिकाऱ्यांचे निर्देश; कामकाजात येणार गती!