पुण्यातील बालगंधर्व रंगमंदिरात राष्ट्रवादी शरद पवार गटाचा वर्धापन दिन कार्यक्रम पार पडला. या कार्यक्रमात शरद पवार गटाचे खासदार, आमदारांसह अनेक पदाधिकारी, नेते-कार्यकर्ते उपस्थित आहेत. पश्चिम महाराष्ट्र हा शरद पवारांचा बालेकिल्ला समजला जातो. पश्चिम महाराष्ट्रातील सातारा जिल्ह्यातही पवारांचा मोठा प्रभाव आहे. साताऱ्यातील पाटणमध्ये राष्ट्रवादी शरद पवार गटाला धक्का बसला.
बालेकिल्ल्यात धक्का...
advertisement
राष्ट्रवादी काँग्रेस (शरदचंद्र पवार गट) पक्षाचे पाटणमधील नेते विक्रमसिंह पाटणकर यांचे चिरंजीव सत्यजितसिंह पाटणकर यांनी अखेर भारतीय जनता पक्षात अधिकृत प्रवेश केला आहे. गेल्या अनेक दिवसांपासून त्यांच्या भाजप प्रवेशाबाबत चर्चा रंगल्या होत्या, त्या आज पुण्यातल्या विशेष कार्यक्रमात प्रत्यक्षात आल्या.
या प्रवेश सोहळ्याला खासदार उदयनराजे भोसले, आमदार अतुल भोसले आणि भाजप प्रदेश कार्यकारी अध्यक्ष रवींद्र चव्हाण हे उपस्थित होते. सत्यजितसिंह पाटणकर यांचे पक्षात औपचारिक स्वागत करण्यात आले.
पाटण मतदारसंघात पाटणकर कुटुंबाची अनेक दशके राजकीय पकड राहिली आहे. त्यामुळे त्यांच्या घराण्यातील प्रमुख व्यक्तीचा भाजपमध्ये प्रवेश झाल्यामुळे स्थानिक राजकारणात मोठी उलथापालथ होण्याची शक्यता व्यक्त केली जात आहे.
सत्यजितसिंह पाटणकर यांच्या प्रवेशामुळे पाटणमध्ये भाजपला नवे बळ मिळेल, अशी अपेक्षा पक्षाकडून व्यक्त करण्यात येत आहे. दरम्यान, राष्ट्रवादी काँग्रेसच्या स्थानिक पातळीवरील गणितांवर याचा परिणाम होणार असल्याचे बोलले जात आहे.
पाटणकरांच्या प्रवेशाने समीकरणं बदलणार?
सत्यजितसिंह पाटणकर आणि राज्याचे मंत्री शंभूराज देसाई हे पाटणमधील राजकीय प्रतिस्पर्धी आहेत. मतदारसंघाच्या पुनर्रचनेनंतर 2009 मध्ये पाटणमध्ये पहिल्यांदाच शंभूराज देसाई यांना विजय मिळाला होता. त्यानंतर सातत्याने देसाई हे विजय मिळवत असून विक्रमसिंह पाटणकर आणि त्यानंतर सत्यजित पाटणकर यांना पराभव स्वीकारवा लागला होता. आता भाजपमधील प्रवेशानंतर पाटणमधील राजकीय समीकरणे बदलणार का, याकडे लोकांचे लक्ष लागले आहे.