संजय घोडावत ग्रुपची विमान वाहतूक शाखा असलेल्या स्टार एअरने सोलापूर–मुंबई थेट उड्डाणांची घोषणा केली आहे. यामुळे सोलापूर हे त्यांच्या वाढत्या हवाई वाहतूक सेवेचे 31वे स्थानक ठरणार आहे. ही सेवा आज पासून सुरू होणार आहे. या विमानसेवेचे प्रारंभीचे भाडे फक्त 3,999 रुपये इतके असणार आहे. या हवाई सेवेचे पहिले उड्डाण मुंबई विमानतळावरुन होणार असून त्याचे उदघाटन मुख्यमंत्री देवेंद्र फडणवीस यांच्या हस्ते झाले.
advertisement
आठवड्यातून चार दिवस असणार 'ही' सेवा
ही सेवा आठवड्यातून चार दिवस मंगळवार, बुधवार, शुक्रवार आणि शनिवार असणार आहे. या मार्गामुळे व्यावसायिक तसेच पर्यटकां साठी अधिक सोयीस्कर होणार असून, प्रादेशिक आर्थिक विकासालाही या मुळे चालना मिळणार आहे.
- फ्लाइट S5 333: मुंबईहून दुपारी 12:50 ला सुटेल, सोलापूरला 02:10 ला पोहचणार आहे.
- फ्लाइट S5 334: सोलापूरहून 02:40 ला सुटेल, मुंबईला 03:45 ला पोहचणार आहे.
स्टार एअरच्या चीफ कमर्शियल अँड मार्केटिंग ऑफिसर शिल्पा भाटिया म्हणाल्या की , सोलापूरला आमच्या वाढत्या नेटवर्क मध्ये सामील करण्याचा आम्हाला अत्यंत आनंद आहे. महाराष्ट्र सरकारच्या प्रादेशिक हवाई संपर्क योजनेस मिळालेल्या ठोस पाठिंब्यामुळे हे मार्ग शक्य झाले आहे. सोलापूर हे उद्योग, शिक्षण व संस्कृतीचे केंद्र असून या नव्या सेवेमुळे प्रवासाचा वेळ कमी होईल, तसेच मुंबईशी व्यापारी व पर्यटन क्षेत्रातील संबंध अधिक दृढ होतील.
तिकिटे विक्रीसाठी उपलब्ध
या नव्या जोडणीनंतर स्टार एअर आपले प्रादेशिक विमान वाहतुकीचे जाळे अधिक विस्तारत असून प्रवाशांना आरामदायी आणि सहज प्रवासाचा अनुभव देत आहे. तिकिटे आता एअरलाइन वेबसाइट आणि ट्रॅव्हल पार्टनर्सद्वारे विक्रीसाठी खुली आहेत.