TRENDING:
महाराष्ट्रातल्या वेगवेगळ्या महापालिकांमध्ये शिवसेना- भाजपमध्ये महापौरपदावरून रस्सीखेच सुरू असतानाच एकनाथ शिंदेंच्या शिवसेनेने मोठी राजकीय खेळी केली आहे. वंचित बहुजन आघाडीचे दोन नगरसेवक गळाला लागल्यामुळे शिवसेनेचा महापौर बसण्याचा मार्ग मोकळा झाला आहे.
भाजपला बाजूला ठेवून शिवसेनेचा महापौर
उल्हासनगर महानगरपालिकेमध्ये शिवसेना आणि भाजप यांच्यात महापौरपदावरून जोरदार रस्सीखेच सुरू आहे. उल्हासनगरमध्ये असलेल्या 78 जागांपैकी भाजप आणि शिवसेनेला प्रत्येकी 37-37 जागांवर विजय मिळाला, तर वंचित बहुजन आघाडीचे 2 आणि काँग्रेसचा एक नगरसेवक निवडून आला. काँग्रेस आणि वंचितच्या नगरसेवकांना मिळून सत्ता स्थापन करणार असल्याचा दावा शिवसेना आणि भाजपने केला, पण आता शिवसेनेने एक पाऊल पुढे टाकलं आहे.
advertisement
उल्हासनगर महानगरपालिका निवडणुकीमध्ये वंचित बहुजन आघाडीकडून निवडून आलेल्या दोन नगरसेवकांनी शिवसेनेला आपला पाठिंबा जाहीर केला आहे. वंचितकडून निवडून आलेल्या दोन नगरसेवकांनी उपमुख्यमंत्री एकनाथ शिंदे यांची त्यांच्या मुंबईमधील निवासस्थानी जाऊन भेट घेतली आणि पाठिंब्याचं पत्र सुपूर्द केलं आहे. यावेळी कल्याणचे खासदार श्रीकांत शिंदेही उपस्थित होते.
आपल्या प्रभागाचा सर्वांगीण विकास व्हावा, तसंच दलित वस्ती सुधार योजनेच्या माध्यमातून आपल्या प्रभागातील कामे करता यावीत, यासाठी हा पाठिंबा देत असल्याचं नगरसेवकांनी एकनाथ शिंदे यांना सांगितले आहे.
शिवसेना-भाजपला स्पष्ट बहुमत नाही
उल्हासनगर महानगरपालिका निवडणुकीमध्ये भाजप आणि शिवसेना वेगळे लढले होते. 78 जागांच्या या महापालिकेमध्ये बहुमतासाठी 40 ची संख्या गाठावी लागणार आहे, पण भाजप आणि शिवसेनेपैकी कुणालाही मॅजिक फिगर गाठता आलेली नाही, त्यामुळे काँग्रेस आणि वंचित बहुजन आघाडीच्या नगरसेवकांना आपल्याकडे घेण्यासाठी दोन्ही पक्ष प्रयत्न करत होते, ज्यात शिवसेनेला यश आलं आहे. आम्ही भाजपला बाजूला ठेवून सत्ता स्थापन करणार, असं शिवसेनेच्या शहरप्रमुखांनी निकाल लागल्यानंतर स्पष्ट केलं होतं.