भारती मेढी यांनी काही वर्षांपूर्वी घरगुती स्तरावर मोदक बनवण्यास सुरुवात केली होती. सुरुवातीला शेजारी, नातेवाईक आणि ओळखीच्या मंडळींकडून मिळालेला प्रतिसाद पाहता त्यांनी हळूहळू या व्यवसायाचा विस्तार केला. आज कोथरूडमध्ये त्यांनी सुरू केलेल्या या फॅक्टरीत रोज हजारो कामगार कार्यरत असून दिवसाला लाखो मोदक तयार होतात. कुटुंबातील सदस्यांचा मदतीने त्यांनी हा व्ययसाय उभा केला. दरवर्षी लाखो मोदक बनणाऱ्या त्यांच्या फॅक्टरीमध्ये त्यांनी यंदा 5 लाख मोदक बनवण्याचं टार्गेट ठेवलं आहे.
advertisement
गणेशोत्सवात वाढती मागणी
गणेशोत्सव जवळ आला की पुण्यात मोदकांची मागणी अनेक पटींनी वाढते. पारंपरिक उकडीचे मोदक, चॉकलेट, ड्रायफ्रूट्स, केशर, आमरस अशा विविध फ्लेवर्समध्ये मोदक येथे तयार केले जातात. पुण्यातील नामवंत मंडळे, घरगुती गणपती तसेच राज्यभरातून येणाऱ्या ऑर्डर्सची पूर्तता या फॅक्टरीतून केली जाते.
शेकडो महिलांना रोजगार
भारती मेढी यांच्या या उपक्रमामुळे आतापर्यंत शेकडो महिलांना रोजगार मिळाला आहे. स्वयंपाक आणि गोड पदार्थ बनवण्याचा अनुभव असलेल्या महिला येथे काम करून आर्थिकदृष्ट्या सक्षम होत आहेत. पारंपरिक कौशल्य आणि आधुनिक यंत्रसामग्री यांचा संगम घडवून आणल्यामुळे उत्पादनाची गुणवत्ता तसेच वेग दोन्ही टिकवून ठेवता येत आहे.
गुणवत्ता आणि स्वच्छतेला प्राधान्य
या फॅक्टरीत स्वच्छतेला सर्वाधिक प्राधान्य दिलं जातं. दर्जेदार साहित्य, शुद्ध तूप, उत्तम दर्जाच्या तांदुळाचं पीठ आणि गुळ यांचा वापर करून मोदक तयार केले जातात. त्यामुळे ग्राहकांचा विश्वास टिकून आहे.
भारती मेढी यांचा हा प्रयत्न केवळ व्यावसायिक उपक्रम न ठरता गणेशभक्तीचा एक भाग बनला आहे. आज कोथरूडमधील ही मोदक फॅक्टरी पुण्यातील गणेशोत्सवाच्या तयारीत महत्त्वाचा घटक बनली असून परंपरा, चव आणि उद्योजकतेचे उत्तम उदाहरण ठरत आहे.