महाविकास आघाडीच्या जागा वाटपात वाई विधानसभा मतदारसंघ राष्ट्रवादी काँग्रेस शरदचंद्र पवार पक्षाडे आला आहे. शरद पवारांनी अरुणा पिसाळ यांना तिकिट देऊन चांगला डाव टाकला आहे. आता वाईत राष्ट्रवादीच्या दोन गटांमध्ये सामना होईल. आमदार मकरंद पाटील यांच्यापुढं सातारा जिल्हा परिषदेच्या माजी अध्यक्षा अरुणादेवी पिसाळ यांचं आव्हान असणार आहे.
advertisement
वाई विधानसभा मतदारसंघ इतिहास
वाई मतदारसंघात सातारा जिल्ह्यातील वाई, खंडाळा आणि महाबळेश्वर या तालुक्यांचा समावेश होतो. वाई हा विधानसभा मतदारसंघ सातारा लोकसभा मतदारसंघात मोडतो.
वाईमध्ये गेली अनेक वर्षं काँग्रेस आणि त्यानंतर राष्ट्रवादी काँग्रेसचेच उमेदवार आमदार होत आहेत. गेल्या तीन निवडणुका मकरंद जाधव पाटील हेच जिंकले आहेत. 2009 ची निवडणूक मकरंद पाटलांनी अपक्ष म्हणून लढवली आणि ते जिंकले. 2014 आणि 2019 ला त्यांना राष्ट्रवादीने तिकिट दिलं. सलग तीन वेळा जिंकून मकरंद पाटलांनी हॅटट्रिक साधली आहे. पण ते अजित पवार यांचे समर्थक असल्याने या वेळी महायुतीचे अधिकृत उमेदवार आहेत. त्यांचे पारंपरिक विरोधक आता त्यांच्या सोबत आहेत.
वाई विधानसभा मतदारसंघात 2004, 2009, 2014 आणि 2019 च्या विधानसभा निवडणुकीत मकरंद पाटील विरुद्ध मदन भोसले अशी लढत पाहायला मिळाली होती. मात्र, मदन भोसले भाजपमध्ये आहेत. महायुतीत ही जागा अजित पवार यांच्या राष्ट्रवादी काँग्रेसकडे आहे. त्यामुळं मदन भोसले यावेळी रिंगणात नाहीत.शरद पवारांच्या पक्षाकडून अरुणादेवी पिसाळ यांची उमेदवारी जाहीर करण्यात आली आहे. त्यामुळं आता मतदारसंघात मकरंद पाटील विरुद्ध अरुणादेवी पिसाळ अशी लढत होईल.
भायखळा विधानसभा निवडणूक 2024: लोकसभेच्या पराभवातून सावरत यामिनी जाधव सावरणार का भायखळ्याचा गड?
मकरंद पाटील यांच्यासाठी सोपी वाटणार निवडणूक आता आव्हानात्मक झाली आहे. कार अरुणादेवी पिसाळ यांच्यामागेही कार्यकर्त्यांची फौज आहे. राष्ट्रवादी काँग्रेसचे कार्यकर्ते शरद पवार आणि अजित पवारांमध्ये विभागले गेले आहेत. कोणाची ताकद अधिक हे आता निवडणुकीनंतरच कळेल.
2024 लोकसभा निवडणुकीत काय झालं?
वाई विधानसभा मतदारसंघ सातारा लोकसभा मतदारसंघात येतो. साताऱ्यात या लोकसभा निवडणुकीच्या वेळी हाय व्होल्टेज उमेदवार होते. महाविकास आघाडीचे शशिकांत शिंदे विरुद्ध महायुतीचे उदयनराजे भोसले यांच्यात लढत झाली. भाजपचे उदयनराजे यांनी निवडणुकीत बाजी मारली. त्यांनी राष्ट्रवादी शरदचंद्र पवार पक्षाच्या शशिकांत शिंदे यांचा उदयनराजे यांना 5 लाख 71 हजार 134 मते मिळाली. त्यांनी शिंदे यांचा 32771 मतांच्या फरकाने पराभव केला. पण वाई विधानसभा मतदारसंघात लोकसभा निवडणुकीवेळी शशिकांत शिंदे आघाडीवर राहिले होते. त्यांना वाईत मताधिक्य होतं. आता या निवडणुकीत वाईची जनता कुठल्या राष्ट्रवादीच्या पारड्यात मत टाकणार हे लवकरच समजेल.
सातारा जिल्ह्यातील विद्यमान आमदार आणि त्यांची भूमिका
1. सातारा जावळी- शिवेंद्रराजे भोसले- भाजप
2. वाई - मकरंद पाटील – राष्ट्रवादी
3. फलटण- दीपक चव्हाण – राष्ट्रवादी शरदचंद्र पवार
4. माण खटाव- जयकुमार गोरे- भाजप
5. कोरेगाव- महेश शिंदे- शिवसेना
6. कराड उत्तर - बाळासाहेब पाटील – राष्ट्रवादी शरदचंद्र पवार
7. कराड दक्षिण - पृथ्विराज चव्हाण - कॉंग्रेस
8. पाटण - शंभुराजे देसाई – शिवसेना
पाटण विधानसभा निवडणूक 2024: पाटणचा गड कोण राखणार, तिसंगी लढत होणार का?