बेंगळुरू: 2013 साली आलेल्या स्पेशल २६ या चित्रपटातील कथा सर्वांच्या चांगली लक्षात राहिली. अक्षय कुमार मुख्य भूमिकेत असलेल्या या चित्रपटात एक टोळी बनावट सीबीआय अधिकाऱ्यांच्या वेशात विविध ठिकाणी छापे टाकते आणि लाखोंची लूट करते. असाच एक प्रकार कर्नाटकची राजधानी बेंगळुरू भरदिवसा झाला आहे.
advertisement
बेंगळुरूमध्ये बुधवारी दुपारी साउथ एंड सर्कलजवळ एक फिल्मी स्टाईलने दरोडा (रॉबरी) पडला, ज्याची बातमी ऐकून कोणालाही धक्का बसेल. एक रोकड व्हॅन थांबलेली असतानाच, स्वतःला रिझर्व्ह बँकेचे (RBI) अधिकारी सांगणारे 7-8 जण आले. त्यांनी 'कागदपत्रे तपासणी'च्या (Document Verification) नावाखाली संपूर्ण स्टाफला बाहेर काढले. कर्मचाऱ्यांनी संशय व्यक्त करताच या टोळीने बंदुकीचा धाक दाखवून व्हॅनचा ताबा घेतला आणि त्यातून 7 कोटी 11 लाख रुपये घेऊन पळ काढला. हा संपूर्ण कट इतका अचूक होता की घटनेची माहिती मिळाल्यानंतरही सुमारे एक तास पोलीस अचूक माहिती आणि तथ्ये मिळवण्यासाठी धडपडत होते.
RBI कर्मचारी बनून 7.11 कोटींची लूट
तपासात असे दिसून आले की ही टोळी 'गव्हर्मेंट ऑफ इंडिया'ची खूण आणि बनावट नंबर प्लेट लावलेल्या इनोव्हा कारमधून आली होती. या दरोडेखोरांनी कॅश व्हॅनला साउथ एंड सर्कलवरून डेअरी सर्कलकडे नेऊन फ्लायओव्हरच्या मध्यभागी थांबवले आणि तिथेच रोकड इनोव्हामध्ये भरून ते फरार झाले. लुटीच्या काही मिनिटांपूर्वीच ही सीएमएस (CMS) एजन्सीची कॅश व्हॅन एचडीएफसी बँक, जेपी नगर येथून 7.11 कोटी रुपये घेऊन निघाली होती. टोळीने कर्मचाऱ्यांचे मोबाईल हिसकावून घेतल्याने पोलिसांना घटनेची माहिती उशिरा मिळाली. मात्र दोन सशस्त्र सुरक्षा रक्षक (Security Guards) तैनात असतानाही त्यांनी एकही गोळी का चालवली नाही, तसेच कर्मचाऱ्यांनी पोलिसांना त्वरित माहिती का दिली नाही, यावर संशय व्यक्त होत आहे.
'इनसाइड टिप-ऑफ' आणि बेवारस कार
पोलिसांना सीसीटीव्ही फुटेजच्या आधारे इनोव्हा कारचा मार्ग मिळाला, जी डोमलुर, इंदिरानगर आणि ओल्ड मद्रास रोडवरून जाताना दिसली आणि अखेर भट्टरहल्लीजवळ ती बेवारस स्थितीत सापडली. पोलिसांनी टोळीने पुढे तामिळनाडू किंवा आंध्र प्रदेशकडे पळ काढल्याचा संशय व्यक्त केला असून, शहराच्या सर्व प्रवेश-निर्गमन मार्गांवर नाकेबंदी वाढवली आहे. पोलीस या संपूर्ण प्रकरणाला Inside Tip-Off मिळाल्याची शक्यता गृहीत धरून तपास करत आहेत, कारण दरोड्याची वेळ, ठिकाण आणि हालचाल अत्यंत अचूक होती.
कर्मचाऱ्यांची कसून चौकशी सुरू
सीएमएस एजन्सीचे चारही कर्मचारी (दोन गार्ड, चालक आणि कॅश हँडलर) यांची सिद्दापूर पोलीस ठाण्यात कसून चौकशी सुरू आहे. फॉरेन्सिक टीमने व्हॅनमधून आणि शस्त्रांमधून बोटांचे ठसे (फिंगरप्रिंट्स) गोळा केले आहेत. 'स्पेशल २६' चित्रपट शैलीत दरोडा टाकणारी 7.11 कोटींची रक्कम आणि टोळी सध्या फरार आहे. पोलिसांनी संशयितांची छायाचित्रे जारी केली आहेत आणि संपूर्ण मार्गावरील सीसीटीव्ही फुटेज तपासले जात आहे.