विसर्जन सुलभ, निर्विघ्नपणे पार पडावे, यासाठी महानगरपालिका आयुक्त तथा प्रशासक भूषण गगराणी, अतिरिक्त महानगरपालिका आयुक्त (पूर्व उपनगरे) अमित सैनी यांच्या मार्गदर्शनाखाली बृहन्मुंबई महानगरपालिकेचे जवळपास १० हजार अधिकारी- कर्मचारी, २४५ नियंत्रण कक्ष तसेच अन्य विविध सोयी सुविधांसह सुसज्ज आहेत. यंदा श्रीगणेश मूर्ती विसर्जनासाठी ७० नैसर्गिक स्थळांसह सुमारे २९० कृत्रिम विसर्जनस्थळांवर व्यवस्था करण्यात आली आहे. अधिकाधिक भाविक तसेच सार्वजनिक श्रीगणेशोत्सव मंडळांनी महानगरपालिकेने तयार केलेल्या कृत्रिम तलावांमध्ये श्रीगणेश मूर्ती विसर्जन करण्यास प्राधान्य द्यावे, असे महानगरपालिका प्रशासनाच्या वतीने आवाहन करण्यात येत आहे.
advertisement
गणेशोत्सवासाठी मुंबई लोकलमध्ये रात्रीही फिरा बिनधास्त, शेवटच्या लोकलचा वेळ बदलला
श्रीगणेशमूर्तींच्या विसर्जनासंबंधित पूर्वतयारीबाबत उप आयुक्त (परिमंडळ-२) तथा गणेशोत्सव समन्वयक श्री. प्रशांत सपकाळे यांनी सांगितले की, मुंबईतील श्रीगणेशोत्सवाच्या पार्श्वभूमीवर, बृहन्मुंबई महानगरपालिकेकडून यंदाही अधिकाधिक विविध सोयी-सुविधा पुरविण्यात आल्या आहेत. मुंबईतील घरगुती तसेच सार्वजनिक श्रीगणेशमूर्तीच्या विसर्जनासाठी मागील दोन महिन्यांपासून पूर्वतयारी सुरू आहे. श्रीगणेशमूर्ती विसर्जनासाठी येणारे वाहन चौपाटीवरील वाळूमध्ये अडकू नयेत व मूर्तींचे विसर्जन सुरळीतपणे पार पडावे, यासाठी विविध ठिकाणच्या चौपाटीच्या किनाऱ्यांवर १ हजार १७५ स्टील प्लेट तसेच छोट्या गणेशमूर्तींचे विसर्जन करण्यासाठी विविध ठिकाणी ६६ जर्मन तराफ्यांचीही व्यवस्था करण्यात आली आहे. चौपाट्यांवर सुरक्षेच्या दृष्टीकोनातून २ हजार १७८ जीवरक्षकांसह ५६ मोटरबोटी तैनात केल्या आहेत. निर्माल्य संकलित करण्यासाठी ५९४ निर्माल्य कलशांसह ३०७ निर्माल्य वाहनांची व्यवस्था करण्यात आली आहे.
मुस्लिम तरुणाची अनोखी गणेशभक्ती, 20 वर्षांपासून करतोय बाप्पाची सेवा
महानगरपालिकेच्या विविध खात्यातील कर्मचा-यांमध्ये योग्य तो समन्वय साधण्यासाठी मुख्य नियंत्रण कक्षासह प्रशासकीय विभागांच्या स्तरावर २४५ नियंत्रण कक्ष आहेत. तर सुरक्षेच्या दृष्टीने १२९ निरीक्षण मनोरे उभारण्यात आले आहेत. विसर्जनस्थळावर ४२ क्रेनचीही व्यवस्था करण्यात आली आहे. विविध ठिकाणी २८७ स्वागत कक्ष तयार करण्यात आले आहेत.
विसर्जनस्थळी येणाऱ्या भाविकांसाठी आरोग्य विभागाकडून २३६ प्रथमोपचार केंद्रांसह ११५ रुग्णवाहिका देखील सज्ज ठेवण्यात आल्या आहेत. विसर्जनस्थळी प्रकाश योजनेसाठी सुमारे ६ हजार १८८ प्रकाश झोत दिवे (फ्लडलाईट) आणि शोधकार्यासाठी १३८ दिवे (सर्चलाईट) लावले आहेत. नागरिकांच्या सोयीसाठी १९७ तात्पुरती शौचालये उपलब्ध करुन दिली आहेत. त्याचबरोबर आपत्कालीन परिस्थितीचा सामना करण्यासाठी महानगरपालिकेतर्फे अग्निशमन दलाच्या सुसज्ज वाहनासहीत प्रशिक्षित मनुष्यबळ तैनात करण्यात आले आहेत.
मुंबई-गोवा महामार्गावर प्रवास होणार सुसाट, गणेशभक्तांच्या प्रवासात नसणार विघ्न!
बृहन्मुंबई महानगरपालिकेच्या संकेतस्थळावर तसेच क्यूआर कोड स्कॅन करुन जाणून घेता येणार आपल्या घराजवळील कृत्रिम तलावांचे ठिकाण
मुंबईत पर्यावरणपूरक श्रीगणेशोत्सव साजरा व्हावा, यासाठी बृहन्मुंबई महानगरपालिकेने यंदा सुमारे २९० कृत्रिम तलाव तयार केले आहेत. बृहन्मुंबई महानगरपालिका संकेतस्थळावरील https://www.mcgm.gov.in/irj/go/km/docs/documents/HomePage%20Data/Whats%20New/ganpati_art_ponds.pdf या लिंकवर कृत्रिम तलावांची यादी उपलब्ध आहे. या यादीमध्ये संबंधित कृत्रिम तलावाची गुगल मॅप लिंकही उपलब्ध करुन देण्यात आली आहे. तसेच, क्यूआर कोड स्कॅन करुन किंवा बीएमसी व्हॉटसॲप चॅटबॉट ८९९९-२२-८९९९ या क्रमांकावरुनही कृत्रिम तलावांसंबंधित माहिती जाणून घेता येईल.
विसर्जनादरम्यान नागरिकांनी पावित्र्य जपण्याचे तसेच काळजी घेण्याचे आवाहन
दिनांक ६ सप्टेंबर २०२५ रोजी अनंत चतुर्दशीच्या दिवशी मुंबईतील सर्व विसर्जनस्थळी नागरिकांनी पावित्र्य व मांगल्य जपावे. उत्सवादरम्यान गर्दीच्या तसेच विसर्जनस्थळी जबाबदारीने आणि सतर्कतेने वागावे. बृहन्मुंबई महानगरपालिका आणि मुंबई पोलीस दलाकडून वेळोवेळी दिल्या जाणाऱ्या सुचनांचे काटेकोरपणे पालन करावे, असे आवाहन बृहन्मुंबई महानगरपालिका प्रशासनाकडून करण्यात येत आहे.
बाप्पा गेल्यानंतर लागणार चंद्रग्रहण, या महिलांना घ्यावी लागणार काळजी
मत्स्यदंशापासून बचाव करा, वेळीच प्रथमोपचार घेण्याचे आवाहन
ऑगस्ट ते ऑक्टोबर या कालावधीत मुंबई येथील समुद्राच्या किनारपट्टीवर ‘ब्लू बटन जेलीफीश’, ‘स्टिंग रे’ प्रजातीच्या माशांचा वावर अधिक दिसून येतो. विसर्जनादरम्यान मत्स्यदंश होऊ नये, याची काळजी नागरिकांनी घेण्याचे आवाहन बृहन्मुंबई महानगरपालिका प्रशासनाकडून करण्यात आले आहे. मत्स्यदंशाची घटना घडल्यास चौपाटी परिसरात वैद्यकीय कक्ष सज्ज ठेवण्यात आला आहे. तसेच १०८ रूग्णवाहिकादेखील तैनात करण्यात आली आहे.
विसर्जनाच्या दिवशी समुद्राला येणाऱ्या भरती आणि ओहोटीवेळी नागरिकांनी काळजी घ्यावी. यंदा अनंत चतुर्दशी दिवशी (शनिवार, दिनांक ६ सप्टेंबर २०२५) समुद्रात सकाळी ११.०९ वाजता ४.२० मीटरची भरती, सायंकाळी ५.१३ वाजता १.४१ मीटरची ओहोटी तसेच रात्री ११.१७ वाजता ३.८७ मीटर उंचीची भरती असेल. दुसऱ्या दिवशी म्हणजे रविवार, दिनांक ७ सप्टेंबर २०२५ रोजी पहाटे ५.०६ मिनिटांनी ०.६९ मीटरची ओहोटी, सकाळी ११.४० वाजता ४.४२ मीटरची भरती असेल. विसर्जनासाठी चौपाट्यांवर येणाऱ्या नागरिकांनी भरती व ओहोटीदरम्यान सतर्क राहावे, असे आवाहन बृहन्मुंबई महानगरपालिका प्रशासनाकडून करण्यात येत आहे.
कोकणी खाजा अन् लाडूंची कमाल, सिंधुदुर्गचा तरुण करतोय 80 लाखांची उलाढाल
श्रीगणेशमूर्ती विसर्जनादरम्यान भाविकांनी घ्यावयाची काळजी-
- विसर्जनावेळी भाविकांनी समुद्राच्या खोल पाण्यात जाण्याचा प्रयत्न करु नये.
- मूर्ती विसर्जनाकरीता महानगरपालिकेमार्फत नेमलेल्या प्रशिक्षित मनुष्यबळाची मदत घ्यावी.
- काळोख असणाऱ्या ठिकाणी श्रीगणेशमूर्ती विसर्जनाकरीता जाणे टाळावे.
- महानगरपालिकेने पोहण्याकरीता निषिद्ध केलेल्या क्षेत्रात जाण्याचा प्रयत्न करू नये.
- समुद्रात किंवा तलावात कुणी बुडत असल्याचे निदर्शनास आल्यास त्वरित अग्निशमन दलाचे जवान, पोलिस किंवा जीवरक्षकांना कळवावे.
- कोणत्याही प्रकारची अफवा पसरवू नका किंवा कोणत्याही अफवांवर विश्वास ठेवू नका.
- भाविकांनी लहान मुलांची विशेष काळजी घ्यावी. त्यांना पाण्यात जाऊ देऊ नये.