Shani Asta 2026: वाटतंय तितकं सोपं नाही! शनी-मंगळ-बुधाचा अस्त म्हणजे या 3 राशींवर खराब वेळ

एका पाठोपाठ तीन ग्रह अस्त होत आहेत, या काळात पैशांची चणचण, करिअरमधील अडचणी आणि कुटुंबात वाद वाढण्याची शक्यता आहे. राशींवर होणारा नकारात्मक परिणाम आणि त्यावरील उपाय जाणून घेऊ.

कर्क - तीन मोठ्या ग्रहांचा अस्त होणे कर्क राशीसाठी चिंतेचा विषय आहे. कामाच्या ठिकाणी काही अडचणी वाढू शकतात आणि कौटुंबिक जीवनही तणावपूर्ण राहील. कोणताही मोठा निर्णय घेण्यापूर्वी नीट विचार करणे गरजेचे आहे, कारण एक छोटीशी चूकही तुमचे मोठे नुकसान करू शकते. या काळात राग आणि अहंकार टाळा. लोकांशी बोलताना शब्द जपून वापरा, जेणेकरून विनाकारण वाद होणार नाहीत.

कन्या - शनी, मंगळ आणि बुध यांचा अस्त कन्या राशीच्या लोकांसाठी जोखमीचा काळ ठरू शकतो. तुमच्या खाजगी आयुष्यात अडचणी वाढतील, कामकाजाशी संबंधित प्रकरणांमध्ये अडचणी येतील. मेहनत करूनही अपेक्षेप्रमाणे फळ मिळणे कठीण जाईल. आर्थिक स्थितीवर याचा परिणाम होऊ शकतो, त्यामुळे खर्च मर्यादित ठेवा.

कन्या राशीच्या लोकांनी रिस्क घेऊन गुंतवणूक टाळा, खरंतर सध्या नवीन गुंतवणूक टाळणे हाच उत्तम पर्याय आहे. उत्पन्नाचे नवीन मार्ग शोधण्यासाठी तुम्हाला अधिक धडपड करावी लागेल.

मकर - मकर राशीसाठी हा काळ थोडा कठीण असू शकतो. पैशांचा ओघ मंदावेल, ज्यामुळे तुम्हाला आर्थिक दबावाखाली असल्याचे जाणवेल. अशा परिस्थितीत मोठे किंवा जोखमीचे आर्थिक निर्णय घेणे टाळलेलेच बरे. शारीरिक इजा किंवा अपघाताची शक्यता दिसत असल्याने आरोग्याकडे आणि प्रवासात विशेष लक्ष द्या. जोडीदारासोबत वाद वाढू शकतो, त्यामुळे वैवाहिक आयुष्यात ताळमेळ राखण्यासाठी तुम्हाला जास्तीचे प्रयत्न करावे लागतील.

अशुभ प्रभाव कमी करण्यासाठी उपाय - या ग्रहांचा अस्त तुमच्यासाठी त्रासदायक ठरत असेल, तर खालील उपाय करणे फायदेशीर ठरेल. शनिवारी काळे तीळ, काळे कपडे किंवा मोहरीच्या तेलाचे दान करा. बुधवारी गणपतीची पूजा करून हिरव्या मुगाचे दान करा. मंगळवारी हनुमान चालीसा वाचा, ज्योतिष तज्ज्ञांच्या सल्ल्यानुसार तांब्याचे कडे किंवा अंगठी धारण करणे फायदेशीर ठरू शकते.(सूचना : येथे दिलेली माहिती ज्योतिषीय ज्ञानावर आधारित आहे. याला कोणताही शास्त्रीय पुरावा नाही. न्यूज 18 मराठी त्याची हमी देत नाही.)