फक्त 15 दिवस बाकी! या राशींचा संकटाचा काळ सुरू होणार, शनि साडेसाती लागणार

2026 हे नववर्ष काही दिवसांतच सुरू होत असून, ज्योतिषशास्त्राच्या दृष्टीने हे वर्ष अनेक महत्त्वाच्या ग्रहस्थितींमुळे लक्षवेधी ठरणार आहे. काही राशींसाठी हे वर्ष प्रगती, संधी आणि सकारात्मक बदल घेऊन येणार असले तरी, काही राशींना मात्र शनीच्या प्रभावामुळे आव्हानांचा सामना करावा लागू शकतो. शनि हा कर्म, शिस्त आणि संयमाचा ग्रह मानला जातो, तर बुध हा बुद्धी, व्यवहार आणि व्यवसायाचे प्रतिनिधित्व करतो. 2026 मध्ये शनी आणि बुध यांची मीन राशीत होणारी युती जवळपास 30 वर्षांनंतर घडणार असून, तिचा प्रभाव अनेकांच्या वैयक्तिक आणि व्यावसायिक आयुष्यावर दिसून येईल.

2026 मध्ये शनि मीन राशीत भ्रमण करताना थेट, अस्त, उदय आणि वक्री अशा महत्त्वाच्या अवस्थांमधून जाईल. 7 मार्च ते 13 एप्रिलदरम्यान शनि अस्त अवस्थेत राहील, त्यानंतर 13 एप्रिलला तो पुन्हा उदयाला येईल. 27 जुलै ते 11 डिसेंबर या कालावधीत शनि वक्री असेल. या सर्व टप्प्यांचा एकत्रित परिणाम विशेषतः साडेसाती आणि ढैय्याच्या प्रभावाखाली असलेल्या राशींवर अधिक तीव्रतेने जाणवू शकतो. करिअरमध्ये अडथळे, आर्थिक चढउतार, आरोग्यविषयक प्रश्न आणि नातेसंबंधांतील गैरसमज अशी आव्हाने या काळात समोर येऊ शकतात. त्यामुळे संयम, योग्य नियोजन आणि वेळेवर निर्णय घेणे अत्यंत आवश्यक ठरणार आहे.

मेष - राशीच्या लोकांसाठी 2026 हे वर्ष साडेसातीच्या पहिल्या टप्प्याची सुरुवात दर्शवते. कामाच्या ठिकाणी अडथळे, अपेक्षित यश मिळण्यास विलंब आणि मानसिक अस्वस्थता जाणवू शकते. निर्णय घेताना गोंधळ निर्माण होण्याची शक्यता असल्याने कोणतेही मोठे पाऊल उचलण्यापूर्वी विचारपूर्वक निर्णय घ्यावा लागेल. शनिवारी शनीसंबंधित उपाय केल्यास मनःशांती मिळण्यास मदत होऊ शकते.

मीन - राशीच्या लोकांवर साडेसातीचा दुसरा टप्पा प्रभावी राहील. या काळात आर्थिक बाबतीत अधिक काळजी घ्यावी लागेल, कारण खर्च वाढण्याची शक्यता आहे. कामांमध्ये विलंब, तणाव आणि थकवा जाणवू शकतो. मात्र धार्मिक आणि आध्यात्मिक कार्यांकडे ओढ वाढेल, ज्यामुळे मानसिक बळ मिळू शकते.

कुंभ - राशीच्या लोकांसाठी साडेसातीचा शेवटचा आणि सर्वात कठीण टप्पा 2026 मध्ये येईल. आरोग्य, मानसिक ताण आणि कामातील अडथळे यामुळे त्रास होऊ शकतो. तरीही कुटुंबात काही शुभ घटना घडण्याची शक्यता असून, जबाबदाऱ्याही वाढू शकतात. योग्य नियोजन केल्यास या अडचणींवर मात करता येईल.

धनु - राशीवर शनीच्या ढैय्याचा प्रभाव राहणार आहे. खर्चात वाढ, मानसिक तणाव आणि अनपेक्षित जबाबदाऱ्या येऊ शकतात. धार्मिक आणि सामाजिक कार्यात सहभाग वाढेल, मात्र त्यातून आर्थिक भारही वाढू शकतो. त्यामुळे उत्पन्न आणि खर्च यांचा समतोल राखणे आवश्यक ठरेल.

सिंह - राशीच्या लोकांनाही ढैय्याचा अनुभव येईल. आरोग्याशी संबंधित तक्रारी, विशेषतः डोके, पोट आणि कानांशी निगडित समस्या जाणवू शकतात. उत्पन्न मर्यादित असले तरी नवीन कमाईच्या संधी उपलब्ध होतील. योग्य संधी ओळखून त्यांचा लाभ घेतल्यास आर्थिक परिस्थिती सुधारू शकते.

<strong>(सदर बातमी फक्त माहितीकरिता असून न्यूज 18 मराठी कुठलाही दावा करत नाही) </strong>