'अपघात झाला तेव्हा दिघे साहेब माझ्या पुढच्या गाडीत होते', 24 वर्षांआधी नेमकं काय झालं! अभिजीत पानसेंनी सांगितलं

मराठीत वेगळ्या धाटणीच्या सिनेमांसाठी ओळखले जाणारे अभिजीत पानसे यांनी नुकत्याच एका मुलाखतीत धर्मवीर आनंद दिघे यांच्या आठवणींना उजाळा दिला.

आनंद दिघे यांचा अपघात झाला तेव्हा ते त्यांच्या पुढच्या गाडीत होते असंही त्यांनी सांगितलं.

अमोल परचुरे यांच्या युट्यूब चॅनेलला दिलेल्या मुलाखतीत अभिजीत पानसे यांनी आनंद दिघे यांच्या आठवणींना उजाळा देत सांगितलं, "वंदे मातरम नाटकाच्या रिहर्सलला आनंद दिघे साहेब आले होते तेव्हा माझा गोंधळ उडाला होता. नंतर ते प्रयोगाला आले."

"गणेश दर्शन स्पर्धेच्या आधीचा जो कार्यक्रम होता तो मी बसवला होता. तेव्हा मनोहर जोशी सर लोकसभा अध्यक्ष होते. तेव्हा पाकिस्तानचा झेंडा मी गडकरीत जाळला होता. तेव्हा दिघे साहेब मला म्हणाले की, अरे सर मला म्हणाले की लोकसभा अध्यक्ष आहे, कोणत्या देशाचा झेंडा कुठे माझ्यासमोर जाळतोस."

पानसे पुढे म्हणाले, "दिघे साहेब आता नाहीयेत तर मी कसा त्यांच्या जवळ वगैरे होतो, तर असं नाहीये. एवढा जवळ वगैरेचा भाग नाहीये पण निश्चित मी त्यांचे कार्यक्रम केले, मला त्यांचा सहवास लाभला."

अभिजीत पानसे यांनी आनंद दिघे यांच्यावर ऑडियो बायोग्राफी तयार केली होती. त्यांनी सांगितलं, " सूर्य नावाची ऑडिओ बायोग्राफी केली होती ती फार त्यांना आवडलेली. उदय सबनीस यांनी त्याचं निवेदन केलं होतं. पण माझा राजकीय काही संदर्भ नव्हता."

"दिघे साहेबांचा अपघात आम्ही गणेश दर्शन स्पर्धेचे परीक्षक होतो त्यावेळेला झाला होता. दिघे साहेब माझ्या पुढच्या गाडीत होते तेव्हा तो अपघात झाला वंदनाच्या इथे. आम्ही उजवीकडे वळून गडकरीला गेलो होतो."