बँग्ज अन् मोठा चष्मा! 2026 च्या सुरूवातीलाच तेजश्री प्रधानचा नवा अवतार, PHOTO VIRAL

मुंबई: मराठी मनोरंजन सृष्टीतील लोकप्रिय अभिनेत्री तेजश्री प्रधान सध्या सोशल मीडियावर जबरदस्त चर्चेत आहे. झी मराठीवरील 'वीण दोघांतली ही तुटेना' या मालिकेतून 'स्वानंदी' म्हणून घराघरांत पोहोचलेल्या तेजश्रीने नवीन वर्षाच्या सुरुवातीलाच आपल्या चाहत्यांना एक सुखद धक्का दिला आहे.

तेजश्रीने चक्क आपला लूक बदलला असून, तिचा हा नवीन हेअरकट सध्या इंटरनेटवर व्हायरल होत आहे. नेहमी साध्या आणि पारंपरिक लूकमध्ये दिसणारी तेजश्री आता एका वेगळ्याच अंदाजात समोर आली आहे.

तेजश्रीने नवीन वर्षाच्या निमित्ताने आपले केस कापले असून चक्क बँग्ज ठेवले आहेत. कपाळावर येणाऱ्या केसांच्या बटा आणि त्यावर लावलेला मोठा चष्मा यामुळे तेजश्रीचं रूप पूर्णपणे खुलून दिसतंय. तिचा हा लूक पाहून ती मालिकेतील 'स्वानंदी' वाटतच नाही, तर एखादी कॉलेजमधील मुलगी वाटतेय.

तेजश्रीने आपला हा नवा सेल्फी शेअर करताना एक अर्थपूर्ण कॅप्शनही दिलं आहे. ती म्हणते, "वेगळ्या हेअरकटसह आयुष्याकडे बघण्याचा एक वेगळा दृष्टीकोन मिळवता येईल का, यासाठी हा एक छोटासा प्रयत्न आहे." तिने या पोस्टसोबत #NewYear आणि #HappyLife असे हॅशटॅगही वापरले आहेत.

तेजश्रीचा हा फोटो समोर येताच तिच्या चाहत्यांनी कमेंट्स बॉक्समध्ये कौतुकाचा वर्षाव केला आहे. चाहत्यांनी तिच्या या नव्या लूकला 'सो क्युट' अशी दाद दिली आहे. "अगदी लहान मुलगी वाटतेयंस तेजश्री, खूप गोड लूक आहे," अशी कमेंट एका चाहत्याने केली. "स्वानंदीचा हा मॉडर्न अवतार आम्हाला खूप आवडला," असे म्हणत अनेकांनी तिच्या बदलाचं स्वागत केलं आहे.

मालिकेत तेजश्री आणि दिग्गज अभिनेता सुबोध भावे यांची केमिस्ट्री प्रेक्षकांना खूप भावतेय. 'समर' आणि 'स्वानंदी'च्या नात्यातील गुंतागुंत आणि प्रेम यामुळे ही मालिका टीआरपी चार्टवरही अव्वल आहे. मालिकेत सध्या विविध वळणं येत असली तरी, खऱ्या आयुष्यात तेजश्रीने स्वतःला दिलेला हा मेकओव्हर तिच्या चाहत्यांसाठी एक मोठी ट्रिट ठरला आहे.<span style="font-size: 20px;"> </span>