Gold Price Today: मकर संक्रांतीला सोनं चांदी रॉकेटच्या स्पीडने सुस्साट, एक तोळ्यासाठी मोजावे लागणार इतके पैसे

मकर संक्रांती वर्षातला सर्वात पहिला सण, या सणाला नवरा आपल्या पत्नीसाठी अलंकार घेतो. चांदीच्या वस्तू देतो. मकर संक्रांतीच्या शुभ मुहूर्तावर सोने खरेदी करण्याचा विचार करणाऱ्या सामान्यांच्या खिशाला आज मोठी कात्री बसणार आहे. जागतिक बाजारपेठेतील अनिश्चितता आणि भू-राजकीय तणावामुळे सोन्याच्या दराने ऐतिहासिक उच्चांक गाठला आहे.

आज १४ जानेवारी रोजी राजधानी दिल्लीत २४ कॅरेट सोन्याचा भाव चक्क १,४२,६९० रुपये प्रति १० ग्रॅमवर पोहोचला आहे, तर चांदीनेही २,७५,१०० रुपये प्रति किलोचा टप्पा गाठून नवा विक्रम केला आहे. मुंबईमध्ये २४ कॅरेट सोन्याचा भाव हा १,४२,५४० रुपये प्रति तोळा तर 22 हजार रुपयांचा भाव हा १,३०,६६० रुपये प्रति तोळावर पोहोचला आहे.

अमेरिकेचे राष्ट्राध्यक्ष डोनाल्ड ट्रम्प यांनी इराणसोबत व्यापार करणाऱ्या देशांवर २५ टक्के टॅरिफ लावल्याने जागतिक व्यापारात भीतीचे वातावरण आहे. तसेच इराणवर लष्करी कारवाई करण्याचे संकेत दिल्याने गुंतवणूकदारांनी आपला मोर्चा सोन्याकडे वळवला आहे.

रशिया आणि युक्रेनमधील संघर्ष अद्यापही शमलेला नसल्याने जागतिक बाजारपेठेवर त्याचे सावट कायम आहे. अमेरिकेने ग्रीनलँड ताब्यात घेण्याचे संकेत दिल्यानंतर डेन्मार्कने लष्करी ताकद वापरण्याची धमकी दिली आहे. या आंतरराष्ट्रीय तणावामुळे सुरक्षित गुंतवणूक म्हणून सोन्याची मागणी वाढली आहे.

अमेरिकेचे फेडरल रिझर्व्हचे अध्यक्ष जेरोम पॉवेल यांच्यावर सुरू झालेल्या गुन्हेगारी चौकशीमुळे अमेरिकन अर्थव्यवस्थेत अस्थिरता निर्माण झाली आहे. ट्रम्प आणि पॉवेल यांच्यातील वादामुळे डॉलर कमकुवत होण्याची भीती आहे.

सोन्यापाठोपाठ चांदीच्या किमतीतही मोठी वाढ झाली आहे. आज चांदीचा भाव २,७५,१०० रुपये प्रति किलोवर पोहोचला आहे. आंतरराष्ट्रीय बाजारात चांदी ८५.६४ डॉलर प्रति औंस या विक्रमी स्तरावर व्यवहार करत आहे. मकर संक्रांतीच्या मुहूर्तावर सोन्याचे दान किंवा खरेदी करण्याची परंपरा आहे, मात्र या गगनभेदी किमतींमुळे सामान्य ग्राहकांमध्ये नाराजीचे वातावरण दिसत आहे.