Multiflex ला तिकिट 1400-2500 रुपये, त्यापेक्षा आपल्या 'भारतमाता'मध्ये स्वस्तात बघा 'धुरंधर', किती आहे तिकिट?

सध्या सर्वत्र 'धुरंधर' सिनेमाची जबरदस्त क्रेझ पाहायला मिळतेय. सोशल मीडियावर ट्रेंडिंगपासून ते थिएटरबाहेरील हाऊसफुल्ल बोर्डपर्यंत या सिनेमाची क्रेझ आहे.

या लोकप्रियतेसोबतच तिकिटांच्या वाढलेल्या दरांमुळे अनेक सर्वसामान्य प्रेक्षकांना हा सिनेमा पाहणं कठीण होत असल्याचं चित्र आहे.

फिनिक्स, आयनॉक्स, मुव्ही मॅक्ससारख्या मल्टिप्लेक्समध्ये 'धुरंधर'च्या तिकिटांची किंमत तब्बल 1400 ते 2500 रुपयांपर्यंत पोहोचली आहे. त्यामुळे कुटुंबासह सिनेमा पाहणं अनेकांसाठी परवडणारे राहिलेलं नाही.

दरम्यान लालबागमधील ऐतिहासिक भारतमाता टॉकीज पुन्हा सुरू झाल्यानंतर प्रेक्षकांसाठी एक मोठा दिलासा मिळाला आहे. 'भारतमाता टॉकिज' या सिंगल-स्क्रीन थिएटरला मुंबईतील मराठी प्रेक्षकांचा विशेष जिव्हाळा आहे.

गिरणी कामगारांपासून स्थानिक कुटुंबांपर्यंत अनेक पिढ्यांनी येथे सिनेमा पाहण्याचा आनंद घेतला आहे. तब्बल सहा वर्षांनी हे थिएटर आता नव्या रूपात पुन्हा प्रेक्षकांच्या भेटीला आलं आहे.

नूतनीकरणानंतर भारतमाता टॉकीज नव्या सोयी-सुविधांसह सज्ज जालं आहे. या सगळ्यांतही सर्वात महत्त्वाचं म्हणजे इथले तिकिट दर. 'धुरंधर'सारखा चर्चेत असलेला सिनेमा येथे फक्त 200 ते 300 रुपयांत पाहायला मिळत आहे.

भारतमाता टॉकीज 24 मार्च 2026 पासून पुन्हा सुरू झालं. पण सुरुवातीला पहिल्या शोमध्ये मराठी सिनेमा न दाखवल्यामुळे काही प्रेक्षकांनी नाराजी व्यक्त केली होती. व्यवस्थापनाने तो केवळ ट्रायल शो असल्याचं स्पष्ट करत पुढील काळात मराठी चित्रपटांना प्राधान्य दिलं जाईल, अशी हमी दिली आहे.

मल्टिप्लेक्सच्या महागड्या तिकिटांमुळे निराश झालेल्या प्रेक्षकांसाठी भारतमाता टॉकीज हा खऱ्या अर्थाने पर्याय ठरत आहे. विशेषतः मराठी सिनेमांवर प्रेम करणाऱ्या प्रेक्षकांमध्ये या थिएटरबद्दल पुन्हा एकदा उत्साह निर्माण झाला आहे.