Goa Night Club Fire: एक स्फोट झाला अन् सर्वत्र मृतदेहांचा पडला खच, फायर ब्रिगेड आत जाताच दिसलं भयंकर दृश्य

Goa Night Club Fire: गोव्याची राजधानी पणजीपासून २५ किमी अंतरावर असलेल्या अर्पोरा गावात मोठी दुर्घटना घडली आहे. येथील एका नाईटक्लबमध्ये सिलिंडरचा स्फोट होऊन लागलेल्या भीषण आगीत २३ जणांचा होरपळून मृत्यू झाला आहे.

सिलिंडरचा स्फोट होऊन ही दुर्घटना घडल्याची प्राथमिक माहिती असून मृतांमध्ये बहुतांशी लोक नाईटक्लब कर्मचारी असल्याचं मानलं जात आहे. तसेच यात काही पर्यटकांचा देखील समावेश असल्याची माहिती आहे.

गोवा पोलिसांनी घटनेची पुष्टी केली आणि सांगितले की रात्री १ वाजण्याच्या सुमारास नाईटक्लबच्या किचनजवळ गॅस सिलिंडरचा स्फोट झाला. स्फोट इतका शक्तिशाली होता की काही सेकंदातच आग संपूर्ण क्लबमध्ये पसरली.

अग्निशमन दलाच्या अनेक गाड्या घटनास्थळी दाखल झाल्या आणि सुमारे दोन तासांच्या प्रयत्नांनंतर आग आटोक्यात आणण्यात आली.

प्राथमिक तपासात असे दिसून आले आहे की स्फोट झाला, नाईट क्लब बंद करण्याची तयारी सुरू असताना घडला आहे. गॅस गळतीमुळे ही दुर्घटना घडली असावी, असा पोलिसांचा अंदाज आहे.

स्थानिक पोलीस, एफएसएल टीम आणि जिल्हा प्रशासनाने घटनेचा सविस्तर तपास सुरू केला आहे. मृतांचे मृतदेह शवविच्छेदन तपासणीसाठी पाठवण्यात आले आहेत. मृतांची संख्या आणखी वाढण्याची भीती आहे.

डीजीपी म्हणाले की क्लबची आगीची सुरक्षा मानके, गॅस कनेक्शन आणि बाहेर पडण्याची योजना देखील तपासली जाईल. सध्या, नाईट क्लब सील करण्यात आला आहे आणि मालकांची चौकशी केली जात आहे.

या दुर्घटनेनंतर गोव्याचे मुख्यमंत्री प्रमोद सावंत यांनी तातडीने घटनास्थळी धाव घेतली. त्यांनी घटनास्थळाची पाहणी केली आहे.

मुख्यमंत्री सावंत म्हणाले, "पर्यटनाच्या हंगामातील ही एक दुःखद घटना आहे. आम्ही या घटनेची सविस्तर चौकशी करू आणि दोषींवर कठोर कारवाई करू."