Weather Alert: कल्याण-डोंबिवलीत हवामानाचा पॅटर्न बदलला, 19 डिसेंबरला अलर्ट

उत्तर भारतातून येणाऱ्या शीत लहरींमुळे डिसेंबरच्या सुरुवातीलाच राज्यात थंडीची लाट निर्माण झाली होती. आता थंड वाऱ्यांचा प्रभाव कमी झाला असला तरी ठाणे-मुंबई परिसरात काही प्रमाणात गारठा कायम आहे. 19 डिसेंबरला ठाण्यासह कल्याण-डोंबिवली परिसरात हवामानात पुन्हा बदल जाणवण्याची शक्यता आहे. हवामान विभागाचा अंदाज जाणून घेऊ.

ठाणे परिसरात किमान तापमानात 1 ते 2 अंशांची वाढ झाली आहे. कल्याणध्ये सकाळचा गारठा कायम असला तरी तापमानात काहीशी वाढ झाली आहे. आज शुक्रवारी किमान तापमान 18 ते 19 आणि कमाल 33 अंश सेल्सिअसच्या दरम्यान राहील.

डोंबिवली शहरातील हवामानाचा पॅटर्न पुन्हा बदलण्याची शक्यता आहे. आज किमान तापमान 15 ते 19 अंश सेल्सिअस तर कमाल 34 ते 36 अंश सेल्सिअस दरम्यान राहील. सकाळी हवेत दाट धुक्याचे सावट असून दुपारी उष्णतेची तीव्रता वाढत आहे.

कल्याण डोंबिवली ग्रामीण भागात शहरापेक्षा जास्त थंडी जाणवेल. किमान तापमान 18°C ते 22 अंश सेल्सिअस तर कमाल तापमान 28 ते 32 असेल. ग्रामीण भागात सकाळी आणि रात्री कडाक्याची थंडी तर दुपारी उबदार हवामान जाणवत आहेत. आज स्वच्छ आकाश, कमी आर्द्रता आणि सुखद थंडी जाणवेल.

बदलापूर, शहापूर आणि मुरबाड परिसरात देखील हवामानात बदल जाणवत आहेत. गेल्या काही दिवसांपासून थंडीची लाट कमी झाली असली तरी या भागात देखील गारठा कायम असून सकाळी दाट धुके पडत आहे. बदलापूरला किमान तापमान 15 अंशांपर्यत घसरले असून मुरबाडमध्ये ते 18 अंश सेल्सिअवर राहील. हवामानातील सततच्या बदलांमुळे नागरिकांना आरोग्याची काळजी घ्यावी लागेल.