Marathwada Rain: मराठवाड्यात पुन्हा मुसळधार, 24 तासात बदलणार हवा, हवामान विभागाचा अलर्ट नवा!

राज्यभरात गेल्या दोन दिवसांपासून ढगाळ वातावरण आहे. मात्र मान्सूनचा जोर कमी झाला असून काही भागांत रिमझिम पावसाची हजेरी आहे. मराठवाड्याच्या बहुतांश जिल्ह्यांमध्ये पावसाने उघडीप दिलीये. मात्र आज 2 ऑगस्ट रोजी स्थानिक वातावरणाच्या बदलांमुळे काही ठिकाणी हलक्‍या स्वरूपाचा पावसाची शक्यता आहे. पुढील 24 तासांचा हवामान अंदाज जाणून घेऊ.

मराठवाड्यातील आठही जिल्ह्यांमध्ये आज श्रावणधारा बरसण्याची शक्यता हवामान विभागाने वर्तवली आहे. पावसाच्या पार्श्वभूमीवर येथील भागात ढगाळ वातावरण तयार झाले आहे. मात्र अद्याप कोणत्याही जिल्ह्यासाठी हवामान विभागाकडून 'सतर्कता' किंवा 'खबरदारी'चा अधिकृत अलर्ट जारी करण्यात आलेला नाही. दरम्यान छत्रपती संभाजीनगर जिल्ह्यात हवामानात काही महत्त्वाचे बदल जाणवत आहेत. आकाशात ढग साचले असून, काही ठिकाणी हलक्या सरींची शक्यता आहे.

छत्रपती संभाजीनगरसह जालना, परभणी, बीड, हिंगोली या पाच जिल्ह्यात आज ढगाळ वातावरण राहण्याची शक्यता आहे. यावेळी हलक्‍या पावसाच्या सरी पडू शकतात. तसेच नांदेड, लातूर आणि धाराशिव या तीन जिल्ह्यात हलका पाऊस आणि विजांचा कडकडाट आणि ढगांचा गडगडाट होण्याचीही शक्यता आहे.

गेल्या काही दिवसांत मराठवाड्यात अनेक भागांत दमदार पावसाने हजेरी लावली होती. आता मात्र हवामानात काही महत्त्वाचे बदल जाणवत असल्याने सध्या पावसाचा जोर काहीसा कमी झाल्याचे चित्र आहे. त्यामुळे अनेक भागात पावसाने विश्रांती घेतल्याचे तर काही भागात हलक्या पावसाचे वातावरण आहे. शेतकऱ्यांनी पिकाची आणि नागरिकांनी आपल्या आरोग्याची काळजी घेणे गरजेचे आहे.

आज मराठवाड्यातील आठही जिल्ह्यांना हवामान विभागाने कोणताही 'सतर्कतेचा अलर्ट' जारी केलेला नाही. सध्या हवामान स्थिर असले तरी, उद्या 3 ऑगस्ट रोजी काही जिल्ह्यांमध्ये 'येलो अलर्ट' जारी करण्यात आला आहे. हवामान खात्याच्या अंदाजानुसार उद्या काही भागांत जोरदार पावसाची शक्यता आहे. त्यामुळे सर्वांनी योग्य ते नियोजन करावे असे आवाहन हवामान विभागाकडून करण्यात आले आहे.