Weather Alert: छ. संभाजीनगर ते बीड वारं फिरलं, मराठवाड्यातील या जिल्ह्यांना पुन्हा अलर्ट

राज्यासह मराठवाड्यात गेल्या काही दिवसांपासून हवामानात सातत्याने बदल होत आहेत. आज 6 डिसेंबर रोजी पुन्हा हवापालट होणार असून काही जिल्ह्यांमध्ये किमान किमान तापमानात किंचित वाढ होण्याची शक्यता आहे. छत्रपती संभाजीनगरसह आठही जिल्ह्यांचा पुढील 24 तासांचा हवामान अंदाज जाणून घेऊ.

छत्रपती संभाजीनगरमध्ये दिवसभर आकाश निरभ्र राहणार असून हवा कोरडी असेल. शनिवारी कमाल तापमान 30.0 तर किमान 14.5 अंश सेल्सिअस इतकं राहील. दुसरीकडे जालना जिल्ह्यात दिवसाभर अंशतः ढगाळ वातावरण राहील. कमाल तापमानात सुमारे दोन अंशांची घसरण होण्याची शक्यता आहे. तसेच येथे दिवसा तापमान 27.8 पर्यंत, तर रात्रीचे तापमान 15.0 राहील. त्यामुळे थंडीचा कडाका जालना पट्ट्यात स्पष्ट जाणवू शकतो.

परभणी जिल्ह्यात आज आकाश पूर्णपणे स्वच्छ राहणार असून पहाटेचा गारवा अंगात शिरणारा असेल. दिवसभर हवा कोरडी राहिल्याने थंडी अधिक वेळ टिकू शकते. बीड जिल्ह्यातही दिवसभर आकाश निरभ्र राहणार आहे. वातावरणातील बदलांमुळे गारठा वाढण्याची शक्यता असून कमाल तापमान 28.4 तर किमान तापमान 16.4 राहणार आहे.

हिंगोली आणि नांदेडमध्ये आकाश निरभ्र राहणार असलं तरी वाऱ्याचा वेग, हवा कोरडी असणं आणि काही ठिकाणी अंशत: ढगाळ हवामान यामुळे तापमानात घट होऊ शकते. सकाळ-संध्याकाळच्या वेळी थंडी अधिक जाणवेल. लातूरमध्ये देखील 6 डिसेंबर रोजी थंडी वाढण्याची शक्यता आहे. येथे कमाल तापमान 27.0 तर किमान 17.5 राहील. धाराशिव जिल्ह्यात आकाश काही प्रमाणात ढगाळ राहिल्याने रात्रीचा गारठा वाढण्याची शक्यता आहे.

मराठवाड्यातील तापमानात सततचे उतार-चढाव सुरू असून काही ठिकाणी थंडी कमी जाणवेल तर काही भागांत गारठा वाढण्याची चिन्हे आहेत. शनिवारी कोणत्याही जिल्ह्याला विशेष इशारा नसला तरी वातावरणातील अनियमित बदलांमुळे सर्दी, ताप, घसा बसणे यासारख्या तक्रारी वाढू शकतात. त्यामुळे नागरिकांनी आरोग्याची काळजी घ्यावी.