Marathwada Rain: विजांचा कडकडाट अन् ताशी 50 किमी वेगाने वारे, मराठवाड्यात 48 तासांसाठी अलर्ट

राज्यातील कोकण, घाटमाथ्यासह काही भागात मान्सूनचा जोर वाढत आहे. मराठवाड्यात देखील पावसाची प्रतीक्षा संपली असून काही ठिकाणी हलक्या ते मध्यम पाऊस सुरू हे. आज छत्रपती संभाजीनगरसह 5 जिल्ह्यांत वादळी वाऱ्यांसह जोरदार पावसाची शक्यता वर्तवण्यात आली असून हवामान विभागाने यलो अलर्ट जारी केला आहे. पुढील 24 तासांचा हवामान अंदाज जाणून घेऊ.

छत्रपती संभाजीनगरसह जालना, परभणी, हिंगोली आणि नांदेड 5 जिल्ह्यांत आज जोरदार पावसाचा अंदाज आहे. या काळात छत्रपती संभाजीनगरमध्ये ताशी 30 ते 40 किमी वेगाने वारे वाहतील. तसेच सोसाट्याचा वारा आणि विजांच्या कडकडाटात हलका ते मध्यम स्वरूपाचा पाऊस होईल. हवामान विभागाने या ठिकाणी पुढील 48 तासांसाठी यलो अलर्ट जारी केला आहे.

जालना, परभणी, हिंगोली आणि नांदेड या जिल्ह्यांनाही आज पावसाचा यलो अलर्ट देण्यात आला आहे. या ठिकाणी ताशी 40 ते 50 किमी वेगाने वारे वाहणार असून विजांच्या कडकडाटात जोरदार पावसाचा अंदाज आहे. या जिल्ह्यांत देखील पुढील 48 तास हवामानाची हीच स्थिती कायम राहणार आहे.

छत्रपती संभाजीनगरसह 5 जिल्ह्यांना हवामान विभागाने यलो अलर्ट जारी केला असून उर्वरित बीड, लातूर आणि धाराशिव या 3 जिल्ह्यांमध्ये देखील हवामान ढगाळ राहील. तसेच दिवसभरात तुरळक ठिकाणी हलका ते मध्यम पावसाची शक्यता आहे. परंतु, हवामान विभागाने कोणताही सतर्कतेचा इशारा दिलेला नाही.

दरम्यान, खरीप हंगामातील पेरण्या केल्या असून पावसाने ओढ दिल्याने शेतकरी चिंतेत आहे. तर आता पावसाची शक्यता वर्तवल्याने काळी प्रमाणात दिलासा मिळणार आहे. पुढील 48 तास पावसाचे असून पुन्हा उघडीप होणार आहे. त्यामुळे त्यानुसार शेतकऱ्यांना नियोजन करावे लागेल.