आजचं हवामान: 40 ते 50 किमी वेगाने वाहणार वादळी वारे, छत्रपती संभाजीनगरसह 4 जिल्ह्यांना यलो अलर्ट

मराठवाड्यातील हवामानात गेल्या काही दिवसांत मोठे बदल जाणवत आहेत. मे महिन्याच्या सुरुवातीपासूनच बहुतांश जिल्ह्यांत गारपिटीसह वादळी पावसाने हजेरी लावली. आता पुन्हा एकदा वादळी पावसाची शक्यता असून आज हवामान विभागाने 4 जिल्ह्यांना यलो अलर्ट दिला आहे.

मराठवाड्यातील छत्रपती संभाजीनगर, जालना, बीड, धाराशिव या जिल्ह्यांत विजांच्या कडकडाटात वादळी पावसाचा अंदाज आहे. याठिकाणी 40 ते 50 किलोमीटर प्रतितास या वेगाने वारे वाहतील. त्यामुळे हवामान विभागाने 24 तासांसाठी यलो अलर्ट दिला आहे.

परभणी, हिंगोल, नांदेड आणि लातूर या जिल्ह्यांत देखील आज हवामान ढगाळ राहील. तसेच तुरळक ठिकाणी विजांच्या कडकडाटात हलक्या ते मध्यम पावसाचा अंदाज आहे. परभणी येथे 39 अंश, धाराशिव 38 अंश तर हिंगोली आणि नांदेडला 40 अंशांपर्यंत तापमान राहील.

छत्रपती संभाजीनगरसह संपूर्ण मराठवाड्यात पुढील 3 दिवस वादळी पावसाचा अंदाज आहे. मंगळवारी देखील लातूर आणि धाराशिव या जिल्ह्यांना हवामान विभागाने यलो अलर्ट दिला आहे. तर इतर जिल्ह्यांत हलक्या ते मध्यम पावसाचा अंदाज आहे.

मराठवाड्यात काही ठिकाणी झालेल्या गारपिटीने आणि वादळी पावसाने शेतकऱ्यांचे नुकसान झाले आहे. पुढील काही काळ हा धोका कायम आहे. त्यामुळे शेतकरी आणि नागरिकांनी योग्य ती काळजी घ्यावी.