Weather Alert: मराठवाड्याला धोक्याची घंटा! वादळी पाऊस झोडपणार, संभाजीनगर, बीडसह या जिल्ह्यांना अलर्ट

मराठवाड्यातील हवामानात मे महिन्याच्या सुरुवातीलाच मोठे बदल पाहायला मिळत आहेत. गेल्या काही काळात उष्णतेची तीव्र लाट होती. आता मात्र छत्रपती संभाजीनगरसह विविध जिल्ह्यांवर आस्मानी संकट घोंघावत आहे. पुढील काही 3-4 दिवसांसाठी वादळी पावसाचा इशारा हवामान विभागाने दिला आहे.

मराठवाड्यातील अनेक जिल्ह्यांमध्ये वादळी पावसाचा धोका निर्माण झाला आहे. विशेषतः बीड, लातूर, परभणी, नांदेड, हिंगोली, जालना, धाराशिव व छत्रपती संभाजीनगर जिल्ह्यांसाठी ‘येलो’ व काही ठिकाणी ‘ऑरेंज’ अलर्ट जारी करण्यात आला आहे. या भागांत ढगांचा गडगडाट, विजांचा कडकडाट आणि 40-50 किमी/तास वेगाने वारे वाहण्याची शक्यता वर्तविण्यात आली आहे.

आज बीड, लातूर आणि परभणी या जिल्ह्यांमध्ये सायंकाळपर्यंत वादळी वाऱ्यांसह पावसाची शक्यता आहे. काही ठिकाणी गारपीट होण्याचा अंदाजही वर्तविण्यात आला आहे. त्यामुळे नागरिकांनी व शेतकऱ्यांनी विशेष काळजी घेण्याचे आवाहन करण्यात आले आहे.

7 आणि 8 मे रोजीदेखील हवामानात अस्थिरता राहणार असून हलक्या ते मध्यम स्वरूपाच्या पावसाचा अंदाज आहे. विजांच्या कडकडाटासह वारे वाहण्याची शक्यता कायम राहील. हवामानातील अचानक बदलांमुळे शेतातील पिकांवर परिणाम होण्याची शक्यता असून पिकांचे संरक्षण करणे गरजेचे आहे.

9 व 10 मे दरम्यान काही जिल्ह्यांमध्ये हवामान थोडे स्थिर राहण्याची शक्यता असली तरीही दुपारनंतर काही भागांत पावसाचे पुन्हा आगमन होऊ शकते. त्यामुळे नागरिकांनी बदलत्या हवामानाचे अपडेट घ्यावेत. तसेच विजांचा धोका टाळण्यासाठी सुरक्षित ठिकाणी थांबावे. आरोग्याची काळजी घ्यावी.