एक क्लिक हजार शब्दांचा, तुम्हीच निवडा बेस्ट PHOTO

जागतिक छायाचित्र दिनानिमित्त कोल्हापुरात कोल्हापूर प्रेस क्लब व प्रेस फोटोग्राफर यांच्या वतीने अवतीभवती छायाचित्र प्रदर्शन भरवण्यात आले आहे.

कोल्हापुरातील 20 वृत्तपत्र छायाचित्रकारांनी टिपलेली 100 पेक्षा जास्त छायाचित्रे या प्रदर्शनात मांडण्यात आली आहेत.

दिनांक 19 ऑगस्ट ते 26 ऑगस्टपर्यंत सकाळी 10 ते रात्री 8 या वेळेत कोल्हापुरात दसरा चौक परिसरातील शाहू स्मारक भवन येथे हे प्रदर्शन भरवण्यात आले आहे.

दरम्यान नागरिकांनी अवतीभवती हे छायाचित्र प्रदर्शन पाहण्यासाठी सकाळपासूनच गर्दी केली होती.

यामध्ये सचिन तेंडुलकर आणि बालमित्र विनोद कांबळी यांचे मुक्त छायाचित्रकार राजा उपळेकर यांनी टिपलेले एक छायाचित्र प्रदर्शनात ठेवण्यात आले आहे.

डेक्कन ओडिसी या रेल्वेमधून अनेक परदेशी पाहुणे कोल्हापुरात येत असत. त्यांच्या समोर चित्तथरारक मैदानी खेळाची प्रात्यक्षिके दाखवतानाचा एक क्षण मुक्त छायाचित्रकार संजय देसाई यांनी टिपला आहे.

एकीकडे कोल्हापुरच्या रंकाळ्यावरील रम्य संध्याकाळ तर दुसरीकडे शहर परिसरात एक माऊलीचे कष्ट दर्शविणारे क्षण तरुण भारत या वृत्तपत्राचे छायाचित्रकार इम्रान गवंडी यांनी टिपलेत

जंगलचा राजा वाघोबाची ऐटच न्यारी असे शीर्षक देत ताडोबा अभयारण्यातील व्याघ्र दर्शनाचा योग पुढारी वृत्तपत्राचे छायाचित्रकार नाज ट्रेनर यांनी छायाबद्ध केला आहे.

कोल्हापुरात टोल विरोधात आंदोलन पेटले असताना ओंदोलनाच्या उद्रेकाचा सामान्य नागरिकांवर होणारा परिणाम मुक्त छायाचित्रकार मालोजी केरकर यांनी टिपला आहे.

कोल्हापुरात तयार होणारा उत्तम प्रतीचा गुळ बनवण्यामागे असणाऱ्या हातांना गुळाचा इंजिनियर हे शीर्षक देत हे दैनिक सकाळचे छायाचित्रकार बी. डी. चेचर यांनी छायाचित्र काढले आहे.

छोट्या खांद्यावर मोठा भार असे म्हणत कोल्हापुरातील ऊस तोड मजूर आणि त्यांच्या मुलांची व्यथा छायाचित्राच्या रुपात टाइम्स ऑफ इंडियाचे छायाचित्रकार राहुल गायकवाड यांनी मांडली आहे.

करवीर निवासिनी अंबाबाई मंदिरात किरणोत्सव सोहळ्याच्या आणि सूर्यग्रहणा वेळच्या छटा दैनिक पुढारीचे छायाचित्रकार टाकळकर यांनी टिपल्या आहेत.

झोपडीत भलेही अंधार असला, तरी शिक्षण घेण्यासाठीची ओढ दर्शविणारे ऑनलाइन शिक्षण पद्धतीतील क्षण दर्शवणारे छायाचित्र दैनिक तरुण भारतचे छायाचित्रकार रियाज ट्रेनर यांनी टिपले आहे

महाराष्ट्र राज्याचा राज्य प्राणी असणाऱ्या शेकरू या प्राण्याचे सुंदर असे छायाचित्र अनिल वेल्हाळे यांनी टिपले आहे.

कोल्हापूर जिल्ह्याला 1989 नंतर 2005 साली प्रथमच प्रलयकारी महापूराचा तडाखा बसला होता. यावेळी ड्रोनचे प्रमाण कमी असताना भारतीय हवाई दलाच्या हेलिकॉप्टर मधून पप्पू अत्तार यांनी महापूराचे रौद्ररूप टिपलेले होते.