कोण म्हणतं 5 हजारात व्यवसाय यशस्वी होत नाही? ममता यांनी करून दाखवलं, आता महिन्याला 1 लाख कमाई

अनेक महिलांना सध्याच्या घडीला वाटते स्वतःचा व्यवसाय असावा. त्यामुळे बदलापूरच्या ममता कांबळे यांनी केवळ 5 हजार रुपयांच्या भांडवलात व्यवसाय सुरू केला आहे. त्यांनी सुगंधी मेणबत्त्यांचा व्यवसाय केला आहे. यामधून दरमहा 1 लाख रुपयांहून अधिक कमाई त्यांना होते.

ममता कांबळे यांनी 7K Candle या नावाने ब्रँड तयार केला आहे. त्यांच्या कँडल्स आणि रूम फ्रेशनर्सची देशभरातच नव्हे तर स्वित्झर्लंड, कॅनडा, अमेरिका मधूनही मोठी मागणी आहे.

ममता कांबळे व्यवसाय सुरू करण्यापूर्वी एका खासगी बँकेत नोकरी करत होत्या. त्यांना नेहमीच स्वतःचं काहीतरी करावंसं वाटत होते. शेवटी त्यांनी नोकरीला रामराम ठोकत उद्योजकतेचा मार्ग स्वीकारला.

घरूनच त्यांनी सुगंधी मेणबत्त्या तयार करण्यास सुरुवात केली. दर्जा आणि वेगळेपणावर भर दिल्यामुळे ग्राहकांचा मोठा प्रतिसाद त्यांना मिळू लागला.

आज त्या विविध प्रकारच्या आकर्षक आणि दर्जेदार सुगंधी मेणबत्त्या, रूम फ्रेशनर्स बनवतात. या उत्पादनांची खासियत म्हणजे त्यातील सर्जनशील डिझाईन्स आहेत.

यामध्ये मोदक, मोतीचूर लाडू, काजू कतली, विविध फुलांचे बुके, चहा-बिस्किटे, कॉफी अशा थीम्समध्ये तयार केलेले मेणबत्त्यांचे सेट आहेत. यामध्ये नैसर्गिक घटक आणि सुगंधी तेलांचा वापर करण्यात येतो, त्यामुळे हे उत्पादन पर्यावरणपूरकही ठरते.

या मेणबत्त्यांची घर, ऑफिस तसेच गिफ्टिंगसाठी मोठी मागणी आहे. सण-उत्सवांच्या काळात तर मागणी दुपटीने वाढते.