शेअर बाजारात उद्या ट्रेडिंग डे, शांततेआड होणार ‘अनएक्स्पेक्टेड’ मूव्ह; गुंतवणूकदार अलर्ट मोडवर

19 जानेवारी रोजी शेअर बाजार उघडताच निफ्टी 50 मधील काही दिग्गज कंपन्यांचे शेअर्स गुंतवणूकदारांच्या विशेष लक्षात राहण्याची शक्यता आहे. यामध्ये रिलायन्स इंडस्ट्रीज, एचडीएफसी बँक आणि आयसीआयसीआय बँक यांचा समावेश असून बँकिंग क्षेत्रासह आयटी क्षेत्रातील विप्रो आणि टेक महिंद्रा या शेअर्समध्येही हालचाल दिसू शकते. याशिवाय आणखी काही कंपन्यांचे तिमाही निकाल आणि महत्त्वाच्या घडामोडींमुळे संबंधित शेअर्समध्ये बाजारात अ‍ॅक्शन पाहायला मिळण्याची शक्यता आहे.

Reliance Industries (RIL): डिजिटल सेवा आणि ऑइल-टू-केमिकल्स (O2C) सेगमेंटच्या मजबूत कामगिरीच्या जोरावर रिलायन्स इंडस्ट्रीजने तिसऱ्या तिमाहीत 18,645 कोटी रुपयांचा शुद्ध नफा नोंदवला आहे. कंपनीचे एकूण उत्पन्न वाढून 2.65 लाख कोटी रुपयांवर पोहोचले असून EBITDA 46,018 कोटी रुपये राहिला. इंधन मार्जिनमध्ये झालेली सुधारणा आणि Jio-bp विक्रीत झालेली वाढ यामुळे O2C सेगमेंटमधील उत्पन्नातही वाढ झाली आहे. शुक्रवारी रिलायन्सचा शेअर 0.15 टक्क्यांनी वाढून 1,461 रुपयांवर बंद झाला होता.

ICICI Bank: आयसीआयसीआय बँकेचा नेट एनपीए तिमाही आधारावर घटून 0.37 टक्के झाला आहे, जो मागील तिमाहीत 0.39 टक्के होता. ग्रॉस एनपीए देखील 1.58 टक्क्यांवरून घटून 1.53 टक्के झाला आहे. याशिवाय बँकेच्या संचालक मंडळाने व्यवस्थापकीय संचालक आणि मुख्य कार्यकारी अधिकाऱ्यांच्या कार्यकाळवाढीस मंजुरी दिली आहे. शुक्रवारी आयसीआयसीआय बँकेचा शेअर 0.38 टक्क्यांनी घसरून 1,413 रुपयांवर बंद झाला.

HDFC Bank: एचडीएफसी बँकेचा नेट एनपीए तिमाही आधारावर 0.42 टक्क्यांवर स्थिर राहिला असून ग्रॉस एनपीए देखील 1.24 टक्क्यांवर कायम आहे. याचा अर्थ बँकेची मालमत्ता गुणवत्ता स्थिर आहे. तिसऱ्या तिमाहीत एचडीएफसी बँकेने 18,653 कोटी रुपयांचा शुद्ध नफा कमावला असून हा आकडा CNBC-TV18 च्या सर्वेक्षणातील अंदाजापेक्षा जास्त आहे. एचडीएफसी बँकेचा शेअर सध्या 930.55 रुपयांवर आहे.

Yes Bank: यस बँकेने तिसऱ्या तिमाहीत दमदार कामगिरी केली असून निव्वळ व्याज उत्पन्नात वाढ झाल्यामुळे नफ्यात वार्षिक आधारावर 55 टक्क्यांची वाढ झाली आहे. बँकेचा शुद्ध नफा 951.6 कोटी रुपयांवर पोहोचला आहे. नेट एनपीए 0.3 टक्क्यांवर स्थिर राहिला असून ग्रॉस एनपीए 1.6 टक्क्यांवरून घटून 1.5 टक्के झाला आहे. शुक्रवारी यस बँकेच्या शेअरमध्ये 2.18 टक्क्यांची वाढ झाली आणि शेअर 23.45 रुपयांवर बंद झाला.

RBL Bank: आरबीएल बँकेचा तिसऱ्या तिमाहीतील शुद्ध नफा 214 कोटी रुपये राहिला, जो बाजारातील 265 कोटी रुपयांच्या अंदाजापेक्षा कमी आहे. व्यवस्थापनाने क्रेडिट कार्ड व्यवहारांमध्ये सातत्याने घट होण्याची शक्यता व्यक्त केली असली, तरी गोल्ड लोनच्या मागणीत सुधारणा होत असल्याचे नमूद केले आहे.

JB Chemicals & Pharma: देशांतर्गत बाजारातील स्थिर वाढ आणि आंतरराष्ट्रीय स्तरावर फॉर्म्युलेशन व्यवसायातील मजबूत वाढीच्या जोरावर जेबी केमिकल्स अँड फार्माने तिसऱ्या तिमाहीत आपल्या नफ्यात 21.6 टक्क्यांची वाढ नोंदवली आहे.

Wipro: विप्रोचा तिसऱ्या तिमाहीतील आयटी व्यवसायातील महसूल मागील तिमाहीच्या तुलनेत 3.3 टक्क्यांनी वाढून 23,378 कोटी रुपये झाला आहे. आयटी EBIT मध्ये 8.8 टक्क्यांची वाढ होऊन तो 4,115 कोटी रुपये झाला असून मार्जिन 17.6 टक्के राहिला आहे. कंपनीने चौथ्या तिमाहीसाठी स्थिर चलनात 0 ते 2 टक्के महसूल वाढीचा अंदाज व्यक्त केला असून प्रति शेअर 6 रुपयांचा अंतरिम लाभांश जाहीर केला आहे.

Tech Mahindra: टेक महिंद्राने तिसऱ्या तिमाहीत 1,122 कोटी रुपयांचा शुद्ध नफा नोंदवला आहे. तिमाही आधारावर महसूल 2.8 टक्क्यांनी वाढून 14,393 कोटी रुपयांवर पोहोचला आहे. EBIT मध्ये 11.3 टक्क्यांची वाढ होऊन तो 1,891.6 कोटी रुपये झाला असून मार्जिन वाढून 13.1 टक्के झाले आहे.

Rossari Biotech: रोसारी बायोटेकने तिसऱ्या तिमाहीत 32.7 कोटी रुपयांचा शुद्ध नफा कमावला असून यामध्ये 3.2 टक्क्यांची वाढ झाली आहे. कंपनीचा महसूल 13.4 टक्क्यांनी वाढून 581.6 कोटी रुपयांवर पोहोचला आहे. EBITDA 68.8 कोटी रुपये झाला असला, तरी मार्जिन वार्षिक आधारावर 12.6 टक्क्यांवरून घटून 11.8 टक्के झाले आहे.

UCO Bank: यूको बँकेचा तिसऱ्या तिमाहीतील नफा 15.8 टक्क्यांनी वाढून 739.5 कोटी रुपये झाला आहे. नेट एनपीए 0.43 टक्क्यांवरून घटून 0.36 टक्के झाला असून ग्रॉस एनपीए देखील 2.56 टक्क्यांवरून घटून 2.41 टक्के झाला आहे. यामुळे बँकेच्या मालमत्ता गुणवत्तेत सुधारणा झाल्याचे दिसून येते.

IDBI Bank: आयडीबीआय बँकेने तिसऱ्या तिमाहीत 1,935.5 कोटी रुपयांचा शुद्ध नफा नोंदवला असून हा आकडा मागील वर्षाच्या तुलनेत 1.4 टक्क्यांनी अधिक आहे. मात्र शुद्ध व्याज उत्पन्न घटून 3,209.5 कोटी रुपये झाले आहे. नेट एनपीए 0.21 टक्क्यांवरून घटून 0.18 टक्के झाला असून ग्रॉस एनपीए 2.65 टक्क्यांवरून घटून 2.57 टक्के झाला आहे.

JSW Infrastructure: जेएसडब्ल्यू इन्फ्रास्ट्रक्चरने तिसऱ्या तिमाहीत शुद्ध नफ्यात 9.1 टक्क्यांची वाढ नोंदवत 359 कोटी रुपयांचा नफा कमावला आहे. कंपनीचा महसूल 14.2 टक्क्यांनी वाढून 1,349 कोटी रुपये झाला आहे.

Netweb Technologies: नेटवेब टेक्नॉलॉजीजने डिसेंबर तिमाहीत विक्रमी महसूल आणि नफा नोंदवला आहे. तिमाही दरम्यान महसूल मागील तिमाहीच्या तुलनेत तब्बल 165 टक्क्यांनी वाढून 804.9 कोटी रुपयांवर पोहोचला आहे. याच कालावधीत शुद्ध नफा 73.3 कोटी रुपये राहिला असून हा आकडा सप्टेंबर तिमाहीच्या तुलनेत 90 टक्क्यांहून अधिक वाढ दर्शवतो.

CG Power: मुरुगप्पा समूहातील सीजी पॉवर या कंपनीने अमेरिकेतील एका मोठ्या डेटा सेंटर प्रकल्पासाठी टॉलग्रास इंटीग्रेटेड लॉजिस्टिक्स सोल्युशन्स LLC, USA कडून सुमारे 900 कोटी रुपयांचा मोठा ऑर्डर मिळवला आहे. हा ऑर्डर कंपनीच्या जागतिक डेटा सेंटर क्षेत्रातील प्रवेशाचे प्रतीक असून आतापर्यंत मिळालेला हा कंपनीचा सर्वात मोठा एकल ऑर्डर मानला जात आहे.