दहशतवादाविरोधात शेतकऱ्यांची एकजूट! 'या' प्रसिद्ध पिकाची निर्यात थांबवली, पाकिस्तानला मोठा झटका!

काश्मीरमधील पहलगाममध्ये अलीकडे झालेल्या दहशतवादी हल्ल्याने संपूर्ण देशाला हादरवून टाकलं आहे. या घटनेनंतर देशभरात संतापाची तीव्र लाट उसळली आहे. याचे पडसाद आता राजस्थानच्या भरतपूर जिल्ह्यातही दिसू लागले आहेत. भरतपूरच्या वैर आणि बयाना उपविभागातील शेतकऱ्यांनी पाकिस्तान विरोधात एक मोठा आणि कडक संदेश देणारा निर्णय घेतला आहे.

येथील शेतकऱ्यांनी एकत्र येऊन हा निर्णय घेतला आहे की, ते आता त्यांच्याकडील प्रसिद्ध पानाचं पीक पाकिस्तानला निर्यात करणार नाहीत. प्रत्येक गावात बैठका घेऊन हा निर्णय घेण्यात आला आहे की, जोपर्यंत पाकिस्तानच्या भूमीवरून दहशतवाद पूर्णपणे संपुष्टात येत नाही, तोपर्यंत भरतपूरच्या शेतकऱ्यांचे पाकिस्तानसोबत कोणत्याही प्रकारचे व्यापारी संबंध राहणार नाहीत.

हे पान भरतपूरचं एक प्रमुख शेती उत्पादन आहे, ज्याला केवळ देशातच नाही तर परदेशातही, विशेषतः पाकिस्तानमध्ये खूप मागणी आहे. पण आता शेतकऱ्यांनी राष्ट्रीय हितासाठी याची निर्यात थांबवण्याचा निर्णय घेऊन एक मोठा संदेश दिला आहे. शेतकऱ्यांचं असं म्हणणं आहे की, जेव्हा आपल्या देशाचे सैनिक आणि नागरिक सीमेवर आपले प्राण गमावत आहेत,

अशा परिस्थितीत, व्यावसायिक फायद्यासाठी, दहशतवादाला खतपाणी घालणाऱ्या देशाशी संबंध ठेवणं अजिबात योग्य नाही. शेतकऱ्यांच्या या निर्णयाचं देशभरातून कौतुक होत आहे. लोक म्हणत आहेत की हा केवळ एका पिकाचा बहिष्कार नाहीये. हे देशभक्ती आणि स्वाभिमानाची भावना असलेलं एक मजबूत पाऊल आहे.

विशेष म्हणजे, याआधी केंद्र सरकारनेही पाकिस्तानवर दबाव आणण्यासाठी अनेक कठोर पावले उचलली आहेत. यामध्ये सिंधू पाणी करार (Indus Water Treaty) रद्द करण्याच्या निर्णयाचाही समावेश आहे. यामुळे पाकिस्तानमध्ये पाणीटंचाई अधिक वाढली आहे.

भरतपूरच्या शेतकऱ्यांचा हा निर्णय आता राष्ट्रीय स्तरावर चर्चेचा विषय बनला आहे. याकडे दहशतवादाविरोधातल्या लोकसहभागाचे प्रतीक म्हणून पाहिलं जात आहे. हे पाऊल केवळ शेतकऱ्यांची देशभक्तीच नाही, तर देशातील प्रत्येक नागरिक दहशतवादाविरोधात एकवटलेला आहे हे सुद्धा दाखवून देतं.