MPSC मध्ये 9 वेळा फेल; पण फक्त दीड वर्षात फेडलं बापाचं लाखो रुपयांचं कर्ज, पोहे विकणाऱ्या तरुणाची प्रेरणादायी गोष्ट!

अशा सर्व परिस्थितीत आपल्या परिस्थितीवर मात करण्याच्या विचाराने त्यांनी पुण्यात येऊन MPSC ची तब्बल नऊ वर्ष केली. मात्र, तरीसुद्धा त्यांना त्यात यश आले नाही. त्यानंतर त्यांनी स्वतःचा व्यवसाय सुरू केला आणि यामधून कर्ज फेडले तसेच घरदेखील घेतलं.

आता काटकर यांचे पुण्यात दोन हॉटेल आहेत. काटकर यांनी गावी स्वतःचे घर बांधले, सर्व कर्ज फेडले. विशेष म्हणजे त्यांनी पुण्यातील सदाशिव पेठ येथील हॉटेलला "होय मी MPSC कर, काटकर बंधू" असे नाव आपल्या हॉटेलला दिले. लोक आवर्जून पोहे खाण्यासाठी येतात.

सुशील काटकर हे मूळचे बीड जिल्ह्यातील यवता या गावचे एका सर्व सामान्य कुटुंबातील आहेत. घरची आर्थिक परिस्थिती हालखीची असल्यामुळे वडील हे व्याजाने पैसे 5 ते 6 हजार रुपये पैसे पाठवत असे. परंतु त्यामध्ये सर्व खर्च भागत नव्हता. त्यांनी एमपीएससीची तब्बल 9 वेळा परीक्षा दिली. पण त्यामध्ये यश काही मिळत नव्हते.

याबाबत त्यांनी बोलताना सांगितले की, 2016 मध्ये अशी एक गोष्ट घडली की गावाकडे गेलो आणि वडिलांना डॉक्टरांकडे घेऊन गेलो. तिथे गेल्यावर काही टेस्ट केल्या आणि त्याची फी 250 रुपये झाली. ती फी भरण्यासाठी वडील माझ्याकडे आणि मी वडिलांकडे पाहिलं. मात्र, तेवढे सुद्धा पैसे आमच्याकडे नव्हते. अक्षरशः परिस्थितीवर रडायला येत होतं. त्याचवेळी ठरवलं की, आपल्याला आता काहीतरी केले पाहिजे.

मग त्यानंतर पुन्हा गावाकडून पुण्याला येत 2018 मध्ये एमपीएससीची प्री पास झालो. मग असं वाटलं की आता पूर्ण मेहनत घेऊन आयपीएस अधिकारी होऊन घरचं सगळं कर्ज आपण फेडू. परंतु त्यामध्येही अपयश आले. ही सगळी तयारी करत असताना कधी कधी उपाशीच रहावं लागत असे. जगण्यासाठी संघर्ष हा सुरूच होता. मात्र, मग आता आपण दुसरं काहीतरी केले पाहिजे, असे ठरवले.

लहान भाऊ आहे. त्याला घेऊन पुण्याकडे आलो आणि त्याला औरंगाबाद याठिकाणी गुलाब पोह्याचा एक स्टॉल टाकून दिला आणि पुण्यात मी 'होय मी MPSC कर काटकर' या नावाने सदाशिव पेठ या ठिकाणी व्यवसायाला सुरुवात केली. पहिली कमाई ही पाच हजार रुपये मिळाली. त्यामुळे खूपच आनंद झाला होता.

तसेच पोह्याचा व्यवसाय करत 18 महिन्यातच वडिलांचे 12 लाख रुपयांचे कर्ज 10 रुपये प्रती प्लेट पोह्यांचा व्यवसाय करुन फेडले आणि घरदेखील बांधले. त्यामुळेच आता जर पाहिले तर या सर्व परिस्थितीवर मात करत बाहेर पडत स्वतःचा व्यवसाय चांगल्याप्रकारे करत आहे, अशी माहिती सुशील काटकर यांनी दिली. त्यांचा हा प्रवास सर्वांसाठी प्रेरणादायी आहे.